Pas motit të keq me reshje intensive të shiut, të cilat shkaktuan përmbytje në disa fshatra,sidomos në Tropojë, situata raportohet të ketë qenë e qetë gjatë natës ndërsa ditën e sotme(18 shtator) rrugët nacionale janë të qarkullueshme normalisht.
Aktualisht pa energji elektrike është Njësia Administrative e Fierzës dhe fshati Valbonë, ndërsa e gjithë pjesa tjetër e territorit të bashkisë Tropojë është e mbuluar me energji elektrike.
Në orët e para të mëngjesit kanë mbërritur në zonat e prekura nga përmbytjet forcat e Emergjencave Civile si dhe është dërguar nga bashkia një fadromë për të pastruar rrugën Tragetet-Dushaj, po ashtu dhe një tjetër është dërguar në fshatin Degë.
Në Belsh pasi uji vërshoi dje në disa rrugë pranë pedonales së qytetit, sot nuk raportohet për probleme te tjera.
Ditën e djeshme, vendi u përfshi nga reshje në formë stuhie e rrebeshi, të cilat krijuan problematika kryesisht në disa qytete si Durrës, Lushnjë, Belsh e Tropojë.
Nga moti i keq u shtynë me 8 orë lundrimet nga Durrësi në Bari.
Më kritike situata paraqitej në Tropojë ku për shkak të sasisë së të reshjeve është raportuar për deme në rrugë, banesa e toka bujqësore në disa fshatra.
Sot moti parashikohet të jetë pa reshje shiu.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.