Gazeta Si - Republikanët në Senatin amerikan kanë bllokuar përparimin e një ligji të jashtëzakonshëm që do të kishte ndarë rreth 111 miliardë dollarë, shumica e të cilave në ndihmë për Ukrainën.
51 votuan pro shqyrtimit urgjent të ligjit, me 49 vota kundër. Ndërkohë që do të duheshin 60 vota.
Për presidentin e Shteteve të Bashkuara, Joe Biden, është një shuplakë në fytyrë, pak orë pas apelit të tij drejtuar Kongresit për të miratuar ndarjen e fondeve në një moment kritik të luftës midis Ukrainës dhe Rusisë.
Teksti parashikonte gjithashtu fonde për Izraelin dhe ndihmë humanitare për Gazën. Senatori i pavarur, Bernie Sanders votoi me republikanët.
Për Shtëpinë e Bardhë, ndihma për Izraelin dhe Ukrainën dhe forcimi i sigurisë në kufirin me Meksikën "janë prioritete dypartiake që meritojnë mbështetjen dypartiake" dhe "votimi nuk e ndryshon faktin që Kongresi duhet të veprojë për t'iu përgjigjur këtyre nevojave urgjente, duke përfshirë sigurimin e fondet e nevojshme urgjente për Ukrainën deri në fund të këtij viti”, tha Këshilltari i Sigurisë Kombëtare, Jake Sullivan.
“Ne nuk mund t'ia lëmë fitoren Putinit. Nëse ai merr Ukrainën, nuk do të ndalet me kaq. Dhe nëse sulmon një vend të NATO-s, ne do të kemi ushtarë amerikanë që do të luftojnë kundër ushtarëve rusë”.
Ishte një thirrje e fortë dhe madje befasuese e transmetuar në televizion nga Joe Biden pas një takimi të improvizuar me video-konferencë të G7, ku mori pjesë edhe presidenti ukrainas, Volodimir Zelenski, i mbledhur për të konfirmuar kohezionin dhe angazhimin e Perëndimit në mbështetje të Ukrainës disa orë pas një votimi dramatik në Kongresi: Senatorët - të ndarë mbi ligjin që cakton 111 miliardë dollarë ndihmë ushtarake dhe ekonomike për vendin e sulmuar nga Rusia, për Izraelin dhe për civilët e Gazës - tani për tani e kanë refuzuar ndërhyrjen.
Shtëpia e Bardhë ka njoftuar një paketë 175 milionëshe, e fundit nga buxheti që presidenti mund të shpenzojë pa kaluar në Parlament.
Fronti ukrainas, jo më në qendër të vëmendjes pas sulmit të Hamasit, është bërë sërish shumë i nxehtë me dështimin e kundërofensivës, riorganizimin e ushtrisë ruse dhe dërgimin e armëve dhe municioneve të furnizuara kryesisht nga SHBA.
Kështu, një Putin me kurrizin pas murit bëhet sërish i frikshëm, madje edhe përtej Ukrainës: ai mund të presë një vit me shpresën e kthimit të "mikut" të tij Trump në Shtëpinë e Bardhë, por nëse përplasja në Uashington bllokon ndihmën, Ukrainasit rrezikojnë të mos kenë armët me të cilat të mbrohen që në janar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.