.png)
Nga Gazeta ‘Si’- Marina amerikane bën me dije se ka rrëzuar gjatë ditës së fundit 24 raketa dhe 18 dronë të lëshuar nga rebelët houthi në Jemen, në një nga sulmet më të mëdha në Detin e Kuq në muajt e fundit.
Lajmin e raporton CNN, duke cituar dy zyrtarë të Pentagonit. Sipas vlerësimeve fillestare, nuk ka pasur anije të dëmtuara nga sulmet dhe as viktima pas lëshimit masiv të dronëve dhe raketave.
Ky ishte sulmi i 26 -të ndaj transportit tregtar në Detin e Kuq që nga 19 nëntori, sipas Centcom, i cili është përgjegjës për ushtrinë amerikane në Lindjen e Mesme dhe disa pjesë të Azisë.
Ndërkohë, Shtëpia e Bardhë përsëriti qëndrimin se Shtetet e Bashkuara nuk mbështesin një armëpushim midis Izraelit dhe Hamasit në Gaza.
Zëdhënësi i Këshillit të Sigurisë Kombëtare John Kirby tha në një konferencë me gazetarët se nuk është ende momenti për një armëpushimi, i cili nëse do të ndodhte tani do të sillte përfitime vetëm për Hamasin.
Të trajnuar dhe financuar gjatë nga Irani, Houthis kanë ndërmarrë një seri sulmesh gjithnjë e më të pacipë ndaj anijeve në Detin e Kuq, me sa duket në mbështetje të Hamasit kundër Izraelit. Megjithatë, shumë nga anijet që synojnë kanë lidhje të dobëta ose aspak me Izraelin.
Shumë kompani të mëdha të anijeve i kanë ridrejtuar anijet e tyre larg Detit të Kuq – i cili lidhet me Mesdheun nëpërmjet Kanalit të Suezit – dhe i kanë dërguar në një rrugë shumë më të gjatë rreth Afrikës Jugore. Kjo ka prishur zinxhirët e furnizimit dhe ka rritur koston e mallrave, duke rritur inflacionin.
Gjatë fundjavës së kaluar, numri i tranziteve përmes Kanalit të Suezit ra në nivelin më të ulët që kur u bllokua nga një anije me kontejnerë në vitin 2021, sipas Inchcape Shipping Services.
Ndërsa çmimet e naftës kanë qenë relativisht të qëndrueshme, me Brent që tregtohet nën 80 dollarë për fuçi, tregtarët janë të shqetësuar për një periudhë të zgjatur sulmesh.
Burimi: Bloomberg/Përshtati Gazeta Si
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
