.png)
Lidhur me përplasjen e artistëve dhe qytetarëve për mosshembjen e Teatrit, ka reaguar edhe kryeministri Edi Rama.
Me anë të një postimi në “Twitter”, Rama tha se Teatri i ri Kombëtar do të ndërtohet si plan e përgjegjësi qeverisëse. Aktorët dhe politikanët që ishin sot në mbrojtje të godinës sipas tij janë minorancë.
“Asnjë minorancë nuk mund të marrë peng asgjë e askënd në këtë vend. Me gjithë respektin për një minorancë aktorësh teatri dhe politikanësh që s’kanë hyrë kurrë në teatër, po janë mësuar të bëjnë teatër me çdo gjë,Teatri i ri Kombëtar do të ndërtohet si plan e përgjegjësi qeverisëse”, shkruan kryeministri Rama në “Twitter”.
Kreu i qeverisë shtoi se askush nuk ka mandat dhe as të drejtë ta pengojë ndërtimin e teatrit të ri.
“Teatrin e ri Kombëtar e kërkon kryeqyteti, vendi, kombi e shumica e komunitetit të artistëve të skenës. Njësoj si Stadiumi i Ri kombëtar ai do të jetë një gur kilometrik në rrugën e Shqipërisë që duam. Kush s’është dakord është i respektuar, po s’ka as mandat as të drejtë të pengojë”, shkruan kreu i qeverisë.
Policia e ka rrethuar Teatrin në tentativë për ta shembur që në orët e para të mëngjesit dhe ka larguar nga hyrja kryesore mbështetësit. Por një gjë e tillë është shoqëruar me përplasje dhe konfrontime fizike, pasi artistët dhe përfaqësues të shoqërisë civile e kundërshtojnë me forcë shembjen e Teatrit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
