Pas kthimit nga Italia, ku sqaroi të gjitha mediat fqinje për situatën në Shqipëri, kryeministri Edi Rama ka shprehur sot në mbrëmje të gjitha mendimet e tij për aksionin opozitar dhe të këqijat që i sjell vendit djegia e mandateve nga PD dhe LSI.
Përmes rubrikës “Përgjigja ime” në “profilin e tij në “Faceboook”, ai ka kritikuar sërish rivalët e tij për “baltosje” imazhi të vendit, ndërsa i ka kujtuar Bashës dhe Kryemadhit se po i afrohet një tjetër humbje në zgjedhje.
“Janë humbësa pa pikë dinjitet, të gatshëm t'i lënë Shqipërisë faturën për dështimin e tyre. Shtëpia nuk është skemë për të shfaqur në sytë e tërë lagjes. Bota s’ka as ngenë dhe as përgjegjësinë për punët që s’na shkojnë mirë. Hapja e kapakut dhe barkut u shkon përshtat atyre që s’ja duan të mirën Shqipërinë. Intervistat e paguara si ajo e Lulzim Bashës veçse e bëjnë qesharak dhe e bëjnë të duket Shqipëria si një shtëpi fshati që ke frikë t’i afrohesh se ka një qen. Një tjetër humbje e thellë dhe e pastër po afron për PD dhe simotrën e saj LSI”, tha Rama.
Kryeministri ka rrëfyer për të parën herë edhe kërkesat që i bëri Lulzim Bashës në takimin e tyre 3 orësh në 17 maj, ku u firmos pakti për hyrjen e PD-së në zgjedhje.
“Kur nënshkruam me Bashën marrëveshjen, i kërkova dy gjëra, rezultati nuk kontestohet dhe Shqipëria nuk shahet në gjuhë të huaj, por u desh një sezon veror që të dyja këto pikat avulluan dhe avazi rifilloi”, shtoi Rama.
Sipas Ramës, “akuzave të sharjes i janë shtuar kërcënimet, po dhuna nuk e ndryshon dot as qeverinë as shumicën në Kuvend, madje i forcon sepse i jep të drejtë mbase dhe aty ku nuk kanë. Po dhuna dëmton imazhin dhe ekonominë vendit. Taksat e qytetarëve të Shkodrës, Kavajës etj.. janë bërë kryesisht rroga dhe me ta paguhen turistët e rrugës së opozitës. Mua më vjen keq kur të huajt pyesin se si ka mundësi që opozita e nënçmon vendin kur dëgjojnë Bashën që thotë ‘il problemo il problemo’”, - theksoi ai.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.