.png)
Nga Gazeta ‘Si’- Disa protestues janë mbledhur mëngjesin e kësaj të marte para godinës së Kuvendit.
Tubimi ishte paralajmëruar një natë më parë nga organizatorët e protestës, të cilët u bënë thirrje qytetarëve të rikthehen para Parlamentit për të vijuar aksionin kundër qeverisë.
Ndërkohë, deputetët e Partisë Socialiste kanë mbërritur në Kuvend rreth 30 minuta përpara nisjes së seancës, në kushtet e protestës së njoftuar jashtë godinës.
Nga protesta dëgjohen thirrje si: “Rama, jep dorëheqjen”, dhe “Opozitë e shitur”.
Tubimi i sotëm vjen pas protestës së 30-të radhazi të zhvilluar mbrëmjen e së hënës para Kryeministrisë, e cila u pasua me marshim në rrugët e Tiranës.
Një nga momentet më të spikatura të protestës u regjistrua në Universitetin Politeknik, ku një grup studentësh shpalosën një banderolë gjigante me mbishkrimet “Ju erdhi fundi!” dhe “Shqipëria nuk është në shitje”, ndërsa ndezën edhe flakadanë.
Sipas organizatorëve, banderola u hoq fillimisht nga rojet e sigurisë, por më pas studentët e shpalosën sërish, duke e kthyer atë në simbol të protestës.
Në tubim morën pjesë edhe disa eurodeputetë, të cilët shprehën mbështetjen e tyre për protestuesit.
Eurodeputetja holandeze Tineke Strik deklaroi se “solidariteti me popullin shqiptar që proteston” do të shoqërohet edhe me përpjekje për ta çuar zërin e tyre në institucionet e Bashkimit Evropian.
Ndërsa eurodeputetja gjermane Jutta Paulus u shpreh se “Shqipëria nuk është në shitje, natyra nuk është në shitje”, duke kërkuar respektimin e standardeve evropiane për mbrojtjen e mjedisit.
Organizatorët kanë deklaruar se kërkesa kryesore mbetet dorëheqja e kryeministrit Edi Rama, ndërsa kanë prezantuar edhe një platformë me pesë pika, ku përfshihen krijimi i një qeverie teknike, zhvillimi i zgjedhjeve të parakohshme, garantimi i votës së lirë, nisja e një procesi të ri politik dhe propozimi për ngritjen e një “Kuvendi Kombëtar Qytetar”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje