Nga Gazeta 'Si'-Në mbledhjen e sotme të Këshillit të Ministrave qeveria ka miratuar vendimin për indeksimin e të gjitha kategorive të pensioneve në masën 8.6%.
Ky vendim mësohet se parashikon indeksimin e pensioneve të të gjitha kategorive duke përfshirë këtu si ato të pleqërisë, invaliditetit apo edhe të tjera.
Zbatimi i këtij vendimi, përfitues të së cilit janë mbi 767 mijë qytetarë në të gjithë vendin, nis nga data 1 tetor.
Ministria e Ekonomisë njofton se vetëm për periudhën tetor – dhjetor të këtij viti efekti financiar në buxhetin e shtetit llogaritet në rreth 3.1 miliardë lekë, ndërsa për vitin 2024 do të jetë 12.1 miliardë lekë.
"Kjo rritje, mbulon gjithë ndryshimin e çmimeve për periudhën gusht 2022 - gusht 2023, të matur nga INSTAT në mënyrë të dedikuar për kategorinë e pensionistëve (Indeksi i Çmimeve të Konsumit për pensionistët është i ndryshëm nga indeksi i popullatës, pasi merr në konsideratë ndryshimet e çmimeve të mallrave dhe shërbimeve që konsumojnë pensionistët)", thuhet në njoftimin e ministrisë.
Gjatë vitit të kaluar janë realizuar dy indeksime, në total në masën 9.5%, me efekt financiar 5.4 miliardë lekë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.