Presidenti i Rusisë Vladimir Putin këmbënguli të shtunën se banorët e 4 rajoneve që Moska i anekskoi në mënyrë të paligjshme vitin e kaluar, “bënë zgjedhjen e tyre për të qenë me atdheun”.
Në një fjalim që u bë publik në orët e para të ditës së shtunë, për të shënuar përvjetorin e parë të aneksimit, zoti Putin tha se aneksimi u krye në përputhje të plotë me normat ndërkombëtare.
Ai pretendoi se banorët në rajonet e Donetskut, Luhanskut, Zaporizhzhias dhe Khersonit e shprehen edhe një herë dëshirën e tyre për të qenë pjesë e Rusisë, në zgjedhjet lokale që u mbajtën muajin e kaluar, në të cilat Komisoni Qëndror i Zgjedhjeve të Rusisë tha se partia në pushtet kishte fituar shumicën e votave.
Më 30 shtator të vitit 2022 Moska i njohu zyrtarisht si territore ruse të katër rajonët ukranase pas mbajtjes së referendumeve, ku Kremlini tha se pati mbështetjen e shumicës dërrmuese të banorëve.
Perëndimi i ka hedhur poshtë rezultatet e zgjedhjeve dhe i ka quajtur të paligjshme aneksimet e rajoneve ku trupat ruse nuk kanë kontroll të plotë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.