.png)
Partia Socialiste thotë se është në përfundim të procesit të përzgjedhjes së kandidatëve për deputetë në zgjedhjet e 25 prillit, duke u zotuar se të paktën 12 emra do të mbërrijnë nga të rinjtë e përzgjedhur përmes platformës “Deputeti që Duam”.
“Jam i sigurt që në të gjitha qarqet do të kemi burra e gra, djem e vajza që kanë ardhur nëpërmjet këtij procesi”, deklaroi Sekretari i Përgjithshëm i PS-së, Taulant Balla.
Balla foli para mediave në përfundim të një takimi me drejtuesit politikë të qarqeve në selinë e partisë. Sekretari i Përgjithshëm i socialistëve thotë se përveç emrave të rinj baza ka votëbesuar edhe deputetët aktualë.
“Kemi marrë një feedback pozitiv nga vlerësimi i deputetëve aktual, mbi të cilën PS do të diskutojë edhe listën përfundimtare. Lista do të jetë uniforme nga kreu i listës deri te i fundit, do të jenë qytetarët ato që do të bëjnë renditjes dhe jam i sigurt që lista do të përcaktohet në disa qarqe nga vetë qytetarët”, u shpreh Balla.
Në lidhje me përgjimet e anti-mafias italiane, Balla thotë se emrat e përmendur në to kanë lidhje me Presidentin Ilir Meta dhe me kryetarin e Partisë Demokratike, Lulzim Basha.
“Eurodeputeti që përmendet është mik i vjetër i Lulzim Bashës e ka pasur edhe në zyrë e ka takuar edhe në Bruksel, edhe në Vlorë. Ata që janë përmendur me emër i keni në Presidencë dhe miq të kryetarit të opozitës”, deklaroi Balla.
Në këtë takim merrte pjesë edhe Kryeministri Edi Rama, por ai e shmangu daljen para gazetarëve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
