Kryeministri Edi Rama i cilësoi çeta enveriste protestuesit e opozitës që kundërshtojnë turin e tij të takimeve elektorale. Në Kukës, Rama e zhvendosi takimin me qytetarët në aeroportin ende jofunksional të këtij qyteti për shkak të protestës së degës së Partisë Demokratike, që paralajmëroi protestë.
Rama u shpreh i bindur se zgjedhjet do të mbahen më 30 qershor dhe ftoi mbështetësit e opozitës që të mos e ndjekin pas atë në kauzën për bllokimin e zgjedhjeve, sepse rrezikojnë burgun.
“Është i rrëzuar Ilir Meta, është i rrëzuar Lulzim Basha, se Saliu edhe kur është i rrëzuar duket sikur është në këmbë. Nuk flas këtu për fallxhoren sepse ajo është e zhytur në kafe turke”, deklaroi Rama.
Kryeministri u prit me protesta. Mbështetësit e opozitës çanë disa herë kordonin e vendosur nga policia e shtetit në drejtim të aeroportit, ku zhvillonte takimin Edi Rama, që kishte mbërritur me helikopter.
Ndalesa në Kukës pasoi atë të Tropojës. Edhe këtu Rama u prit me protesta dhe takimi u zhvillua nën masa të forta sigurie.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.