Presidenti Begaj: Emigrantët shqiptarë duhe të votojnë dhe të përfaqësohen politikisht

Nga Gazeta 'Si'-Në samitin e tretë për Diasporën, presidenti Bajram Begaj ka shprehur nevojën që qytetarët shqiptarë që jetojnë jashtë vendit të kenë mundësinë të ushtojnë të drejtën e tyre të votës.

Begaj u shpreh se diaspora është promotorja e identitetit shqiptar, ndaj duhet parë jo si “pjesë e shkëputur por si zgjatim i natyrshëm i identitetit tonë”.

“Shqipëria është një vend gjeografikisht i vogël por ju i keni dhënë një shtrirje globale shumë më të madhe se përmasat e saj. Diaspora është promotorja më eficente e kulturës dhe identiteti tonë. Secili prej jush sipas mundësive ka dhënë një kontribut për kombin. Shqipëria nuk e ka luksin ta neglizhojë diasporën. Angazhimi juaj është një vlerë e madhe e shquar për shoqërinë tonë. Ju ftoj të kontribuoni aktivisht me ide, sugjerime, projekte e sipërmarrje, për konsolidimin e demokracisë, shtetit të së drejtës, ekonomisë dhe të ardhmes. Unë do të vazhdoj të mbështes punën e nisur nga institucionet shqiptare për shpërndarjen e librave shqip në komunitetet shqiptare në diasporë. Fëmijët duhet të mësojnë shqip kudo që janë”, tha Begaj.

Në vijim, ai u ndal te dy çështje sensitive që kanë të bëjnë me përfaqësimin e Diasporës në jetën politike dhe dëgjimin e zërit të tyre në shoqërinë shqiptare, çka sipas tij mund të realizohet vetëm nëpërmjet votës.

Ai theksoi se kjo mund të arrihet përmes strukturimit të marrëdhënies së shtetit shqiptar me diasporën, duke krijuar mekanizma institucionalë dhe ligjorë, për të bërë që Shqipëria të arrijë potencialin e saj të plotë.

“Në këtë kuptim ka disa hapa të domosdoshëm për t’u ndërmarrë. Pikësëpari është vota. Qytetarët shqiptarë jashtë vendit duhet të kenë mundësi të ushtrojnë të drejtën e tyre kushtetuese për të votuar pa pasur nevojë të vijnë në Shqipëri. Ata duhet të votojnë, sipas një modeli që shumë vende të tjera e aplikojnë me sukses. Kjo do të kthejë diasporën në aktore të drejtpërdrejtë të konfigurimit politik e administrativ në Shqipëri. Së dyti, diaspora duhet të këtë përfaqësim politik që do t’i japë zë prioriteteve të shqiptarëve jashtë vendit. Të gjithë këto janë procese që nuk mund të përmbushen sa hap e mbyll sytë, por nuk janë objektiva të paarritshëm dhe mbi të gjitha janë nisma të domosdoshme që ne si shqiptarë të jemi bashkë edhe pse larg", deklaroi ai.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.