Policia ka proceduar penalisht në gjendje të lirë dy kryebashkiakët e djathtë, atë të Lezhës, Fran Frrokaj dhe atë të Mallakastrës, Agron Kapllanaj.
Dy ditë më parë, kryetari i Bashkisë së Lezhës në një studio televizive deklaroi se më 30 qershor do të mbrojë pronat nën administrimin e bashkisë, duke mos lejuar në këtë mënyrë lejimin e zgjedhjeve më 30 qershor. Ndërsa, kryebashkiaku i Mallakastrës, Agron Kapllanaj, deklaroi se do të jetë i pari që do të shkojë në burg, duke paralajmëruar kështu rezistencë ndaj procesit. Por, këto deklarata për Prokurorinë kanë elementë të krimeve kundër proceseve zgjedhore.
Siç njofton policia, kryebashkiakët janë proceduar penalisht në gjendje të lirë për “Pengim i subjekteve zgjedhore” dhe “Thirrje për veprime të dhunshme”.
Gjithashtu, specialistët e Hetimit të Krimit në Komisariatin Mirditë kanë proceduar penalisht për vepra penale kundër procesit zgjedhor në vend edhe shtetasit:
A. K., 34 vjeç, banues në Mirditë;
Gj. P., 28 vjeç, banues në Mirditë.
Materialet proceduriale u referuan në Prokurorinë pranë Gjykatës Shkallës së Parë Lezhë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.