Dy persona të maskuar të hipur mbi një motor, kanë ndaluar fillimisht dhe goditur më pas me sende të forta një 55-vjeçar, të cilit më pas i kanë marrë një shumë parash.
Ngjarja ka ndodhur rreth orës 09:05 të mëngjesit të së martës në rrugën e Kavajës në kryqëzimin me rrugën “Mihal Duri”. Sipas policisë, Q.Z., po transportonte me motor vlera monetare të një pike valutore.
Autorët i janë afruar me një motor pa targa dhe e kanë goditur me sende të forta në kokë. Nga goditjet e shumta, 55-vjeçari është rrëzuar nga motori. Në këtë moment dy grabitësit i kanë marrë edhe një shumë të konsiderueshme parash.
Pasi kanë grabitur shumën e parave, dy autorët kanë tentuar të largohen por pak metra më tutje ata janë përplasur me një makinë. Në këtë moment ata kanë braktisur mjetin dhe janë larguar nga vendi i ngjarjes në këmbë.
Policia ka shkuar menjëherë në vendngjarje dhe ka nisur kontrollin e zonës. Grupi hetimor po punon për sqarimin e rrethanave të ngjarjes.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.