Gazeta Si – Përveçse do të ndeshet me një kundërshtar të fortë në ‘Play-off’-in e Ligës së Konferencës, Astanën, Partizani ka edhe një kundërshtar tjetër për këtë sfidë: largësinë. Ndeshja e parë luhet në Kazakistan të enjten, por të kuqtë do të udhëtojnë që sot drejt këtij vendi.
Kampionëve të Shqipërisë u duhet të udhëtojnë më shumë se 5 orë me avion, që do të thotë lodhje e madhe për ta. Skuadra e trajnerit Zoran Zekiç pritet të kryejë dy seanca stërvitore në Kazakistan për t’u ambientuar me terrenin dhe temperaturat.
Stërvitja e së hënës ishte e fundit për Partizanin në Shqipëri. Me të kuqtë është bashkuar së fundi edhe mbrojtësi Altin Bytyçi, blerja e ardhur nga Kukësi. Ndeshja e parë mes Astanës dhe Partizanit luhet në orën 16:00 (ora shqiptare), në stadiumin "Astana Arena". Një ndeshje kjo që do të përcaktojë shumë sa i takon objektivit për kualifikimin në fazën e grupeve të Ligës së Konferencës, që do të ishte një arritje historike.
Partizani është e vetmja skuadër e Superiores që ka mbetur në kupat e Europës. Të kuqtë nuk do të luajnë në fundjavë në kampionat, pasi ndeshja e tyre me Teutën është shtyrë nga FSHF. Në ‘Play-off’-in e Ligës së Konferencës marrin pjesë edhe Ballkani kampion i Kosovës dhe Struga kampione e Maqedonisë së Veriut.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.