.png)
Gazeta Si – Gjykata e Tiranës ka lënë në masën e sigurisë “arrest me burg” Altin Mergjyshi (Deda), i cili disa ditë më parë plagosi tre persona në Laprakë të Tiranës.
Në gjyqin ndaj 40-vjeçarin prokuroria kërkoi arrest në burg që u konfirmua edhe nga gjykata. Por masë më të lehtë sigurie kërkoi avokatja mbrojtëse, e caktuar kryesisht nga shteti. Masa lehtësuese arrest në shtëpi nuk u pranua nga togat e zeza.
I pandehuri edhe në seancë mbajti të njëjtin qëndrim si para oficerëve të policisë, duke thënë se plagosjen e kreu në shenjë hakmarrjeje ndaj pronarit italian.
Sipas tij, ai e kishte ndihmuar për të hapur punishten e përpunimit dhe tregtimit të produkteve të bulmetit, por më pas e kishte pushuar nga puna.
Mergjyshi shprehet se i kishte kërkuar paratë që i kishte borxh, por kjo kërkesë e tij ishte refuzuar nga italiani Sorvilo. Në sallën e gjyqit një tjetër pretendim ishte edhe fakti se të plagosurit e kanë provokuar të parët kur ai po kalonte përballë lokalit.
Plagosja e trefishtë në Laprakë ndodhi mbrëmjen e të hënës, ndërsa autori u vetëdorëzua në polici, disa orë pas ngjarjes.
Sherri në lokalin me qira të shtetasit italian, filloi kur Altin Mergjyshi nisi të kërkojë llogari për largimin nga puna.
Ai fillimisht plagosi Viktor Rrapollarin dhe më pas vajzën e tij Roxhersa. I treti që u godit me thikë ishte Massimo Sorvillo, i cili edhe pse me plagë mori makinën dhe bashkë me bashkëshorten dhe vjehrrin shkuan në Spitalin e Traumës.
Ai pohoi se kishte shkuar disa herë edhe në Itali për t'i blerë dhe sjell pajisje për punën e biznesit të tij italianit dhe për këto nuk ka marrë pagesa pasi është hequr nga puna.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
