Shendet

Pfizer gati të shpërndajë vaksinën me urgjencë, pritet “drita jeshile” nga SHBA-ja

Vetëm disa ditë pasi Pfizer dhe BioNTech njoftuan se vaksinat e tyre kundër koronavirusit duket të jetë 95% efektive në parandalimin e Covid-19, kompania paraqiti një kërkesë pranë Administratës Amerikane të Ushqimit dhe Barnave për autorizim urgjent.

Nëse FDA jep dritën jeshile në dy javët e para të dhjetorit, Pfizer dhe BioNTech “do të jenë të gatshëm të shpërndajnë vaksinën brenda disa orësh”, thanë të dy kompanitë. Ky është një proces rekord, pasi koha mesatare që duhet që një vaksinë të licencohet në Shtetet e Bashkuara është zakonisht rreth tetë vjet.

“Me shumë krenari dhe gëzim, madje edhe me një lehtësim, mund të themi se kërkesa jonë për një aprovim urgjent për vaksinën Covid-19 tani është në duart e FDA”, tha drejtori i kompanisë Almer Burla. Sipas tij, regjistrimi për një licencë emergjence ishte një “moment historik në udhëtimin e tyre për të shpërndarë një vaksinë kundër Covid-19”.

Ditë më parë, gjiganti farmaceutik amerikan dhe ai gjerman BioNTech kishin njoftuar se vaksina duket të jetë 95% efektive në parandalimin e infektimit. “FDA e di që transparenca dhe dialogu janë thelbësore që publiku të ketë besim tek vaksinat,” tha Steven Hahn, drejtor i Administratës së Ushqimit dhe Barnave. “Unë dua të siguroj popullin amerikan se procesi dhe vlerësimi i të dhënave për një vaksinë të mundshme do të jetë sa më i hapur dhe transparent,” tha ai.

Të dy kompanitë vlerësojnë se 50 milion doza mund të jenë në dispozicion deri në fund të vitit 2020, me 25 milion doza që do të përdoren në SHBA muajin tjetër. Përveç kësaj, 30 milion doza të tjera mund të jenë të disponueshme në janar dhe 35 milion do të shpërndahen më shumë në dy muajt e ardhshëm. Në Bashkimin Evropian, Presidentja e Komisionit Ursula von der Leyen tha që dozat e para të vaksinës mund të jenë në dispozicion të Shteteve Anëtare deri në gjysmën e dytë të dhjetorit, nëse vaksina aprovohet gjithashtu nga Agjencia Europiane e Barnave (EMA). Dozat e vaksinës së destinuar për në Europë do të prodhohen në fabrikën e BioNTech në Gjermani dhe në fabrikën e Pfizer në Belgjikë.

Nëse vaksina kandidate miratohet nga Agjencia Europiane e Barnave (EMA), atëherë shtetet anëtare të BE-së do të jenë në gjendje të porosisin dozat e tyre.

Sa është efektive?

Të dhënat e publikuara këtë javë treguan se vaksina Pfizer dhe BioNTech ishte 95% efektive. Ky efekt ka prekur të gjitha grupmoshat dhe kombësitë, pavarësisht nga gjinia. Sipas të dy kompanive, vaksina gjithashtu kishte vetëm efekte anësore të lehta.

Përpjekjet për zhvillimin e vaksinës filluan në Mainz, Gjermani, në fund të janarit, kur Ugur Sahin, CEO dhe bashkë-themelues i BioNTech, lexoi për virusin në revistën prestigjioze shkencore Lancet dhe u tmerrua. “Unë e dija pothuajse menjëherë se kjo sëmundje do të na prekte,” tha Sahin në një intervistë.

BioNTech përdori teknologji që nuk ishte aprovuar kurrë për përdorim njerëzor. Ai merr material gjenetik të quajtur ARN dhe e injekton atë në qelizat muskulore, të cilat e përdorin atë si një udhëzues për prodhimin e një proteine që gjendet në sipërfaqen e virusit. Proteinat më pas stimulojnë sistemin imunitar dhe besohet se çojnë në mbrojtje afatgjatë kundër virusit. Kompanitë e tjera, përfshirë Moderna, gjithashtu përdorin teknologjinë ARN.

Lajme të lidhura


Copyright © Gazeta “Si”



Më Shumë