.png)
Gazeta Si - Kryetari i grupit parlamentar të PS-së Bledi Çuçi e ka cilësuar “skenar të opozitës” situatën e tensionuar këtë të hënë në Parlament. Ai deklaroi se skenat e papranueshme të dhunës nuk do ta pengojnë Kuvendin të vijojë punën normalisht.
“Sot besoj ju dhe shqiptarët ishit dëshmitarë të një skene aspak të pranueshme për një vend si Shqipëria. Ju e patë të gjithë se çfarë skenari kishin përgatitur kolegët e opozitës dhe e them me bindje që ishte skenar, sepse sot ishte seanca që ne i drejtohemi dhe shprehim shqetësimet që marrim nga Java e Gjelbërt dhe asnjë nga grupi opozitar që krijoi dhe atë skenë të papranueshme sot në sallë, nuk ishte regjistruar më parë për të folur. Pra, ishin përgatitur më përpara për këtë skenar”, deklaroi Çuçi jashtë sallës së Kuvendit.
Megjithatë, Çuçi u shpreh se seancat në vijim do zhvillohen në kushte krejtësisht normale, duke theksuar se do të miratohen të gjithë projektligjet në të mirë të shqiptarëve.
“Besoj se kjo është e qartë. Skenari i tyre për të prishur me çdo formë seancat solemne se të tilla janë, por ju garantoj që kjo gjë nuk do ndodhë, Parlamenti do vijojë normalisht, ne do miratojmë projektligjet që janë në të mirën e avancimit të Shqipërisë në rrugën drejt BE dhe padyshim në të mirë të gjithë shqiptarëve”.
Sipas Çuçit, tensionet e kësaj të hëne në sallë ishin ‘pasqyrim’ i krizës së Partisë Demokratike, për të cilën shton se nuk e ka fajin mazhoranca.
“Nuk është faji jonë që opozita është në krizë dhe nuk jemi ne në asnjë ëndërr të keqe shkaktarët. Mazhoranca është solide, kjo krizë ka sjellë situata të kësaj natyre, kjo situatë është pasqyrim i krizës që ka opozita. Mos harroni se i kemi fituar ne zgjedhjet, dhe jemi zgjedhur ne për të qeverisur. Ne do vazhdojmë punën tonë, ne s’kemi probleme me opozitën. Jo që se kemi shkaktuar krizën, por as mos prisni që ne ta bashkojmë!".
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
