Situata e përmbytjeve në Shkodër vijon të mbetet problematike.
Shiu i dendur që ka rënë gjatë natës, ka bërë që situata të jetë e rëndë, kryesisht në zonën e Dajçit dhe Obotit.
Bashkia e Shkodrës thotë se sipërfaqja nën ujë është rritur me 400 hektarë të tjerë, teksa 3400 hektarë tokë bujqësore është nën pushtetin e ujit.
Rruga Murriqan-Goricë është e përmbytur, ndërsa në Dajç niveli i ujit është rritur dhe po rrezikon edhe banesat.
Ndërkohë që rruga e Obotit nuk kalohet as nga mjetet e ushtrisë.
Nisur nga situata që ndodhet, Bashkia Shkodër kërkon sërish shpalljen e gjendjes së fatkeqësisë natyrore, në njësitë administrative Ana e Malit dhe Dajç.
“Bashkia Shkodër në kushtet e ndodhura, në referencë të Ligjit Nr.45/2019 “Për Mbrojtjen Civile ”, kërkon shpalljen e gjendjes së fatkeqësisë natyrore, për Nj.A. Ana e Malit dhe Dajç.
Kërkohet që nga Drejtoria e Ujitjes dhe Kullimit Lezhë të ndërhyet për marrjen e masave për pastrimin e “Përroit të kufirit” Muriqan në Nj.A Ana e Malit.
Kërkohet mbështetje me bazë ushqimore për gjënë e gjallë (koncentrat) për NJ.A. Ana e Malit , Dajç dhe Rrethina për një sasi 500 ton”, thuhet në njoftimin e bashkisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
