Politike

Dosja për zgjedhjet në Dibër, Rama sulmon prokurorët

“Zgjedhjet vendore do të zhvillohen më 30 qershor! Kjo është fjalia që nga sot, e deri në ditën e heshtjes elektorale duhet të hapë dhe të mbyllë çdo komunikim tonin”. Ky ishte udhëzimi që Edi Rama u dërgoi publikisht kandidatëve për kryetarë bashkish dhe të gjithë zyrtarëve dhe anëtarëve të thjeshtë të Partisë Socialiste këtë të shtunë.

Rama mblodhi kandidatët për t’u përforcuar idenë e tij se 30 qershori që po vjen nuk është një datë e zakonshme si të tjerat, por është dita e përcaktuar nga Kushtetuta për t’u takuar me zgjedhësit. Kryeministri e pranoi se oferta e klasës politike nuk është e plotë.

“Në vend të një humbjeje dinjitoze, ku me siguri mund t’i fitonin disa bashki, kundërshtarët tanë zgjodhën rrugën e një disfate me qeder për Shqipërinë, ku me siguri qederi do t’u mbetet bashkë me turpin në derë. Për shkak të frikës së tyre nga ballafaqimi me ne, në një pjesë të bashkive nuk do të ketë më shumë se një kandidat”, deklaroi ai.

Megjithatë, kryeministri u zotua për një fushatë intensive ku objektiv nuk do të jetë vetëm fitorja. “Sepse puna e solli që këtë herë, përveçse një betejë zgjedhore për mandatin e ri të qeverisjes vendore, kjo të jetë një betejë për të fituar zemrat dhe mendjet e shqiptarëve në luftë me fantazmën e së shkuarës”, vijoi ai.

Rama përsëriti akuzën ndaj Partisë Demokratike dhe Lëvizjes Socialiste për Integrim se kanë rikthyer hijet e së shkuarës të destabilizimit të vendit. 30 qershori, sipas tij, do të jetë edhe dita kur këto hije do të marrin përgjigje.

“Do të ngordhë përgjithnjë politika e pengmarrjes së procesit demokratik dhe kërcënimit të shtetit si garanti ligjor dhe publik. 30 qershori duhet dhe do të bëhet momenti i pjekurisë demokratike të shoqërisë shqiptare, momenti i rënies përfundimtare të teorisë 30-vjeçare politike shqiptare se në fushën e lojës demokratike mund të fitosh edhe duke minuar fushën”, shtoi ai.

Si përgjegjës të kësaj politike 30-vjeçare nënkupton Sali Berishën, ndonëse në fjalën e mbajtur nuk e përmend asnjëherë emrin e tij.

“30 vite janë boll që i njëjti lider politik, në krye të së njëjtës parti, i cili si President i Republikës dogji Shqipërinë duke e çuar në buzë të luftës civile, si shef i opozitës dogji Kryeministrinë duke e sulmuar me antitank dhe kallashnikov me synimin e vetëm për të vrarë shefin e Qeverisë dhe për të marrë pushtetin me dhunë, si Kryeministër vrau dhe plagosi protestues që armën më të rrezikshme kishin tabelat kundër Qeverisë, të vazhdojë sot të kërcënojë me zjarr dhe me flakë këtë popull nga tmerri se mund t’i vijë më shpejt fletëthirrja e drejtësisë sesa bileta e takimit me Shën Pjetrin”, tha Rama.

Kushti i Partisë Demokratike dhe LSI-së është largimi i tij. Rama tha se nuk kishte se ç’u ofronte përveçse dialogun me kusht të vetëm Kushtetutën. “Jam i gatshëm të ulem me Bashën në çdo moment, kushte nuk kam. Por Kushtetutën e kemi të njëjtë dhe na takon ta respektojmë, ne me të drejtën për t’u zgjedhur në 30 qershor, ata me të drejtën për të mos marrë pjesë në zgjedhje”, tha ai.

Kryeministri iu rikthye dosjes 184, apo dosja e zgjedhjeve në Dibër, ku akuzohet se në përgjime ka dalë edhe zëri i tij. Rama e mohoi dhe tërthorazi akuzoi prokurorët që janë marrë me çështjen në fjalë se kanë furnizuar Partinë Demokratike me këto materiale.

“Përhapet nga ekrane studiosh që duken si kuzhina Big Brotheri, ku debatet duken si muhabete rakie, përgjime qesharake të kërryera nga dosja hetimore në thyerje të sekretit hetimor dhe të dërguara për Big Brotherin nga dora e dikujt që në vend që të hetonte Dibrën e ka mbajtur në sirtar për këtë ditë të zezë për partinë e tij, apo për përgjime të sajuara komplet, ku ka dalë edhe një rresht i vënë në gojën time, i cili s’më shqetëson, por më fyen, sepse nuk është gjuha ime, por gjuha e një mësuesi nate, totalisht pa arsimin përkatës, por edhe jashtë profilit”, vijoi ai.

Kryeministri kujtoi ndëshkimet e Kodit Penal për të gjithë ata që planifikojnë të pengojnë procesin zgjedhor të 30 qershorit. Ndëshkimet sipas këtij kodi, tha ai, mund t’i fusë personat e dënuar në listat e zeza të personave non grata nga SHBA dhe vendet e BE-së.

“Kush i afrohet një qendre votimi me mendje të keqe, djeg veten dhe jo zgjedhjet. Është e rëndësishme të informohen njerëzit se çfarë parashikon kodi penal për individin që prek zgjedhjet. Kjo mund të të fusë në listën e zezë të të dënuarve për krime zgjedhore, të cilëve do t’u hiqet përgjithmonë e drejta e futjes në Shtetet e Bashkuara apo në Bashkimin Europian. Nuk dua kurrë që një shqiptar i zakonshëm t’ia shohë këtë qeder”, deklaroi Rama.

Në fund, Rama e mbylli fjalën me një këshillë. “Qetësi e madhe, durim i fortë dhe vendosmëri e palëkundur”, porositi ai.

 

Më Shumë