Këshilli i Emërimeve në Drejtësi ka vendosur në përfundim të mbledhjes së sotme të lejojë kandidimin e Marsida Xhaferllarit për postin e drejtueses së Inspektoratit të Lartë të Drejtësisë.
Pasi u shqyrtuan aktet dhe procedura e ndjekur për verifikimin e kandidates Marsida Xhaferllari u mor ky vendim nga KED. Në vendimin e marrë, u mor parasysh dokumentacioni i përgatitur lidhur me plotësimin e kushteve ligjore për kandidim dhe pasi KED dëgjoi përfaqësuesit e Avokatit të Popullit lidhur me procedurën e ndjekur në verifikimin e kandidaturave.
Edhe pse më herët nga proçesi i ‘Vettingut’, Xhaferllari e kishte humbur statusin e magjistrates, KED-ja aprovoi kërkesën e saj për të kandiduar për ILD-në dhe një vend në Gjykatën Kushtetuese.
Sakaq, nesër do të vijohet me intervistimin e kandidatëve për ILD-në për të dalë me emrin e drejtuesit të tij në shtator. Ky institucion do të hetojë shkeljet e kryera nga gjyqtarët dhe prokurorët e të të gjitha niveleve, anëtarët të KLG-së, të KLP-së dhe të Prokurorit të Përgjithshëm.
Gjithashtu nesër do të nisë procedura e intervistimit të kandidatëve për Gjykatën Kushtetuese.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.