PD, qeverisë: Anuloni koncesionet dhe PPP për të rindërtuar vendin

Partia Demokratike e quan propagandë mënyrën e sjelljes së qeverisë që sipas saj po gënjen shqiptarët edhe pas tërmetit të frikshëm duke e faturuar si meritë të sajën solidaritetinmbarëkombëtar dhe ndërkombëtar.

Megjithëse po prisnim një reflektim të qeverisë në lidhje me buxhetin 2020 ditën e sotme, shkruan Jorida Dabaku në llogarinë e saj në Fcbook, vërejta se si arkitektët e koncesioneve dhe investimeve fasadë po artikulonin propagandën e një buxheti që nuk do prekej, borxhi që nuk do të rritej, rritje ekonomike të qendrueshme dhe njëkohësisht rindërtimi të Shqipërisë.

Kuptohet, citon ajo, sëmundja e vjetër e propagandës ka rigjetur ritmin për të gënjyer shqiptarët edhe pas tërmetit të frikshëm.

“Ajo po shet solidaritetin e qytetarëve që ofrojnë strehë si arritje të qeverisë, po shet ndihmën ekonomike që BE po ofron (si dhe vendeve të tjera mike) si aftësi të sajën për të dalë nga kriza. Por, asnjë lek në buxhetin e shtetit nuk është shtuar dhe nuk pritet të shtohet për t’i ardhur në ndihmë qytetarëve dhe ekonomisë së shkundur nga tërmeti.”- shkruan Tabaku.

Për të, qeveria dhe aktorët kyç të koncesioneve në vend gënjejnë kur thonë se asnjë lek nga pagat dhe pensionet nuk do të shkojnë për tërmetin. Mjafton të kujtojmë, shprehet ajo, urdhërat e brendshëm të publikuar në media ku urdhërohen nëpunësit civilë, policët, ushtarët dhe administrata publike që të “kontribuojnë”.

Këto urdhëra të brendshëm, për PD janë në të vërtetë rialokimi i fshehtë i buxhetit të shtetit nga fondi i pagave tek fondi i kontigjencës dhe emergjencës.
Sakaq, qeveria pritet që të rrisë borxhin publik, citon Tabaku, megjithëse ish ministri i PPP-ve Ahmetaj, pretendon të kundërtën.

Por si mund të besohet njeriu që u tha shqiptarëve, thotë Tabaku, se paratë që shpenzohen nga buxheti i shtetit nuk është paraja e shqiptarëve?!

“As më shumë e as më pak se një tjetër gënjeshtër, që kësaj radhe bie mbi shqiptarët e plagosur dhe të shkundur nga tërmeti.”- shkruan ajo.

Opozita i ka ofruar qeverisë shqiptare rrugën për të dalë nga ky qerthull, shkruan Tabaku, dhe nga kjo gënjeshtër; anulimin e PPP-ve dhe shumës prej 150 mln USD t’i rialokohet buxhetit për rindërtim. Madje, sipas saj, qeveria mund të shkonte edhe më tej duke ndihmuar me politikat fiskale vendet e prekura nga tërmeti, duke ndihmuar ekonominë e Durrësit që zë 10% të PBB-së dhe është ekonomia e dytë në vend.

Asnjë ndryshim në buxhetin e shtetit, thotë ajo, jo vetëm për rikonstruksionin por as në paketën fiskale për të ndihmuar sipërmarrjet në zonat e goditura nga tërmeti që po bëjnë bilancet e dëmeve. Vetëm Durrësi, sipas Tabakut, përllogaritet të ketë 13% të ndërmarrjeve në rang vendi dhe kontribuon 7,5% në punësim.

“Për këto asnjë lëvizje as nga qeveria dhe as nga parlamenti. Të gjithë në një spekatkël të shëmtuar lajkash, kush më shumë e kush më pak duke thurrur lavde për kryeministrin dhe gënjeshtrën e tij të madhe të titulluar Komiteti i Rindërtimit.”- përfundon ajo.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.