.png)
Nga Gazeta ‘Si’- Grupi Parlamentar i Partisë Demokratike ka depozituar në SPAK një kallëzim penal ndaj kryeministrit Edi Rama, duke e akuzuar për veprat penale të “Shpërdorimit të detyrës”, “Korrupsionit pasiv të funksionarëve të lartë shtetërorë” dhe “Pastrimit të produkteve të veprës penale ose veprimtarisë kriminale”, në formën e bashkëpunimit të grupit të strukturuar kriminal.
Kallëzimi është dorëzuar nga kryetari i Grupit Parlamentar të PD-së, Gazment Bardhi, dhe lidhet me atë që opozita e cilëson si “afera Albanian Files”, duke iu referuar librit “The Albanian Files – Freedom and Architecture”, botuar në qershor 2026 nga shtëpia botuese “Lars Müller Publishers”, me parathënie nga Edi Rama.
Sipas PD-së, përmbajtja e librit tregon një skemë ku kryeministri Rama, në cilësinë e Kryetarit të Këshillit Kombëtar të Territorit (KKT), ka përzgjedhur dhe afruar studio ndërkombëtare arkitekture, të cilat më pas janë lidhur me investitorë shqiptarë për projekte të mëdha ndërtimi në Tiranë dhe zonat bregdetare.
Në kallëzim përmendet si shembull projekti “Sun Moon Star”, një kullë 44-katëshe në Tiranë, e projektuar nga arkitekti amerikan Sam Chermayeff.
PD pretendon se arkitekti është kontaktuar pas një ndërhyrjeje nga zyrtarë shqiptarë dhe më pas projekti është miratuar nga KKT në korrik 2024.
Opozita pretendon se mënyra e përzgjedhjes së arkitektëve dhe lidhjes së tyre me biznesmenët shqiptarë nuk ka ndjekur procedurat normale administrative, por ka krijuar një mekanizëm ku studio të caktuara arkitekture favorizoheshin për të siguruar më pas leje zhvillimi dhe ndërtimi.
Në kallëzim thuhet se tarifat e larta të arkitektëve ndërkombëtarë, të cilat sipas PD-së arrinin deri në disa milionë euro për projekte të caktuara, krijonin një kosto të shtuar për ndërtimet dhe përbënin pjesë të një skeme të dyshuar për përfitime të paligjshme.
PD ngre gjithashtu pretendime për disa projekte në zona të mbrojtura, duke argumentuar se ndryshimet ligjore të mëvonshme për zonat e mbrojtura kanë krijuar dyshime se investitorët mund të kenë pasur informacion paraprak për mundësinë e zhvillimit të këtyre ndërtimeve.
Në dokumentin e dorëzuar në SPAK, Partia Demokratike pretendon se Edi Rama, në bashkëpunim me zyrtarë publikë, biznesmenë dhe arkitektë, ka krijuar një strukturë të organizuar për favorizimin e projekteve të caktuara, duke kërkuar hetimin për veprat penale të parashikuara nga nenet 248, 260, 287 dhe 333/a të Kodit Penal.
Deri në këtë moment, pretendimet e ngritura nga PD janë akuza politike dhe penale të depozituara në SPAK dhe duhet të verifikohen nga organet e drejtësisë. Kryeministri Edi Rama dhe institucionet qeveritare nuk kanë dhënë ende një reagim lidhur me këtë kallëzim.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje