.png)
Opozita duket se i po i përgjigjet kërkesës së ndërkombëtarëve për të ankimuar zgjedhjet lokale të 30 qershorit në Gjykatën. Sot ka qenë pikërisht shoqata e Kryebashkiakëve të Shqipërisë, ku bëjnë pjesë të djathtë që dorëzuan në Gjykatën Kushtetuese kërkesën për ligjshmërinë e votimeve të 30 qershorit.
Kryebashkiakja në detyrë e Shkodrës, Voltana Ademi e dorëzoi së bashku juristin Jordan Draci depozitoi kërkesën ankimore në Kushtetuese, pavarësisht se kjo institucion zyrtarisht është jashtë funksionit për faktin se gjyqtarët janë përjashtuar pas procesit të Vettingut. Ajo qëndroi për shumë se një orë në ambientet e Kushtetueses dhe se kërkesa është marrë në dorëzim nga ana e sekretares së Përgjithshme të këtij institucioni.
Ankimi i dorëzuar në Gjykatën Kushtetuese lidhet me mbajtjen e zgjedhjeve pa dekret të Presidentit dhe po ashtu edhe me regjistrimin e Bindjes Demokratike jashtë afatit. Ndërkohë Partia Demokratike ka kallëzuar penalisht gjithë administratën zgjedhore që u angazhua me procesin e 30 qershorit në Lezhë.Kryetarja e Shoqatës së Kryebashkiakëve të Shqipërisë,Voltana Ademi, ka dorëzuar në Gjykatën Kushtetuese kërkesën për interpretimin e ligjshmërisë së zgjedhjeve të 30 qershorit. Në prani të avokatit që përfaqëson këtë çështje Jordan Daci, kryebashkiakja e Shkodrës tha se shpreson që shqyrtimi i këtij rasti të bëhet menjëherë pas ngritjes së Gjykatës Kushtetuese.
“Kemi referuar në Gjykatën Kushtetuese kërkesën me objekt konstatimin antikushtetues të procesit zgjedhor të zhvilluar me 30 qershor. Objekti i dytë ka lidhje me certifikimin e kushtetutshmërisë të veprimtarisë së partisë Bindja Demokratike lidhur me regjistrimin e saj në zgjedhjet e 30 qershorit me argumentet që tashmë dihen. Dekreti i Presidentit duhej të merrej në konsideratë. Shpresojmë që në momentin e parë që Gjykata Kushtetuese të jetë në punë dhe të funksionojë të mund të fillojë menjëherë gjykimin e një çështje me rëndësi. Edi Rama të mos pengojë dhe kjo gjykatë të ngrihet sa më shpejt dhe të mos fusë duart në emërimet që do të realizohen. Shpresojmë që gjykata të marrë sa më shpejt në shqyrtim këtë çështje. Ne po veprojmë në mënyrë institucionale. Të gjithë kryetarët e bashkive apo subjektet e interesuara kemi bërë atë që ne kemi gjykuar që është e drejtë”, tha Ademi.
Kryebashkiakja e Shkodrës ka depozituar vërtetimin për dorëzimin në Gjykatën Kushtetuese të kërkeses së Shoqatës së Bashkive të Shqipërisë për “1. Konstatimin antikushtetues te procesit te 30 Qershorit. 2. Verifikimin e kushtetueshmërisë së Bindjes Demokratike lidhur me regjistrimin e saj për 30 Qershorin”.
Më herët Partia Demokratike ka dorëzuar kallëzim penal në prokurori për akuzën e krimeve zgjedhore për të gjithë komisionerët dhe numëruesit e angazhuar në votimet e 30 qershorit edhe në Bashkinë e Lezhës. Në padi kërkohet nisja e hetimit për 10 vepra penale nga falsifikimi i dokumenteve dhe rezultatit zgjedhor deri tek kanosja e zgjedhësve. Opozita bën me dije se administrata zgjedhore ka kryer veprime të rënda e të paligjshme në kundërshtim me dekretin e Presidentit.
Gjithashtu edhe ditën e djeshme Partia Demokratike e degës Kamzë dhe Paskuqan kanë paditur në Prokurori komisionerët e PS, për veprën penale te "shpërdorimit te detyrës”. Në një deklaratë të përbashkët për mediat bëhet e ditur se ndaj subjekteve te mësipërme pala paditëse ka paraqitur një sërë faktesh të grumbulluara për kallëzimin e bërë për veprën penale të "Falsifikimit të dokumenteve dhe rezultateve zgjedhore".
“PD Kamzë dhe Paskuqan shprehin besimin e plotë për veprimin në kohë dhe me profesionalizëm të Prokurorisë, me paanshmëri dhe korrektësi në hetimin e plotë të kësaj çështjeje për zbardhjen e të gjitha veprimeve dhe mosveprimeve, të cilat kanë sjellë si rezultat mbajtjen e një procesi votimesh monopartiake me qëllimin e vetëm te dokumentit të një rezultati "Farsë". Partia Demokratike Kamzë dhe Paskuqan deklaron se nga 99700 votues kanë marrë pjesë në këto votime vetëm 6% e zgjedhësve, ndërsa rezultati i falsifikuar i nxjerrë nga KQZ-ja është mbi 10%. Prandaj duke deklaruar se në kutitë e votimit ka më shumë fleta votimi se votues, i gjithë procesi është i manipuluar dhe për rrjedhojë rezultati në Bashkinë Kamëz mbetet "Nul"””, thuhet në deklaratën e lëshuar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
