.png)
Nga Gazeta 'Si'- Izraeli ka bombarduar të hënën(11 dhjetor) qytetin kryesor në jug të Gazës, Khan Junis, pasi Hamas, paralajmëroi se asnjëri prej pengjeve izraelite nuk do të largohet gjallë prej territorit, derisa t’i përmbushin kërkesat për lirimin e të burgosurve.
Hamasi, grupi radikal që udhëheq Gazën, është shpallur grup terrorist prej Shteteve të Bashkuara dhe Bashkimit Europian. Hamasi ka kryer sulmet më vdekjeprurëse ndonjëherë në tokën izraelite, më 7 tetor, duke vrarë rreth 1.200 njerëz, sipas të dhënave izraelite, dhe duke marrë rreth 240 pengje.
Izraeli është përgjigjur me ofensivë ushtarake, e cila e ka shndërruar një pjesë të mirë të Gazës në gërmadhë, dhe ka vrarë rreth 17.990 njerëz, kryesisht gra dhe fëmijë, sipas autoriteteve shëndetësore palestineze.
Sipas tyre, dhjetëra njerëz janë vrarë të hënën, si pasojë e sulmeve izraelite në Rripin e Gazës ndërsa ushtria izraelite ka raportuar për nisjen e raketave nga Gaza drejt Izraelit.
Hamasi ka paralajmëruar të dielën që nuk do t’i dorëzojë pengjet, pa një shkëmbim të të burgosurve palestinezë dhe “negociata për rezistencën”. Izraeli ka thënë se janë ende 137 pengje në Gazë ndërsa aktivistët kanë thënë se 7.000 palestinezë janë ende në burgjet izraelite.
Bombardimet e nisura prej 7 tetorit, dhe ofensiva tokësore, e kanë shtyrë sistemin shëndetësor në Gazë drejt kolapsit, pasi shumica e spitaleve nuk janë funksionale dhe gati dy milionë njerëz janë të zhvendosur.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
