.png)
Pas përfundimit të kampionatit, nga Partizani ka pasur largime të rëndësishme lojtarësh. Sulmuesit Erald Çinari dhe Jasir Asani nuk janë më pjesë e të kuqve, ata kanë kaluar në kampionate të huaja. Çinari ka firmosur në Turqi, kurse Asani në Hungari.
Largimi i radhës nga skuadra e trajnerit Ilir Daja, që po përgatitet për ndeshjet e Ligës së Konferencës, ku do të përballet me një skuadër moldave, është mbrojtësi beratas, Eneo Bitri. Titullari i të kuqve në sezonet e fundit, ashtu si Çinari dhe Asani, është larguar me falënderime për klubin e kuq. Destinacioni i ri i Bitrit nuk është bërë ende i ditur.
Në “ajër” është një tjetër titullar me peshë i Partizanit, Jurgen Bardhi. Ai nuk ndodhet me skuadrën në Ohër, pasi nuk ka gjetur ende gjuhën e përbashkët me drejtuesit për vazhdimin e bashkëpunimit dhe nuk është çudi që edhe mesfushori-sulmues të largohet.
Partizani ka zyrtarizuar sot afrimin e parë ndërkohë. Bëhet fjalë për Emiljano Mustën, që luan në pozicion e mbrojtësit dhe mesfushorti të majtë. Elbasanasi ka qenë edhe më parë pjesë e të kuqve, kështu që kemi të bëjmë me një rikthim. Musta ka luajtur edhe për Teutën, Flamurtarin, Kukësin dhe së fundi ishte pjesë e Laçit. Lojtari 29-vjeçar ka firmosur për 2 vjet me Partizanin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
