Arka e Organizatës së Kombeve të Bashkuara mund të mbetet bosh në fund të këtij muaji, duke rrezikuar që në nëntor pagat për 37 mijë punonjësit e saj të mos derdhen në kohë.
Alarmi është dhënë nga Sekretari i Përgjithshëm i OKB-së, Antonio Guterres përmes një letre të shpërndarë ditën e hënë për të gjithë administratën e organizatës. Letra është siguruar nga agjencia e lajmeve AFP.
Sipas AFP-së, në të Guterres thotë vendet anëtare kanë derdhur deri më tani vetëm 70 për qind të shumës së nevojshme për buxhetin e 2019, që do të thotë se paratë mjaftonin për të mbuluar shpenzimet operacionale të OKB-së deri në muajin shtator.
“Kjo do thotë se në fund të këtij muaji rrezikojmë që të përfundojmë të gjitha rezervat që kemi”, thuhet në letrën e Guterres.
Shuma që nevojitet për të përmbyllur këtë vit përllogaritet në rreth 209 milionë euro. Si masa paraprake, Guterres paralajmëroi shtyrjen e konferencave dhe samiteve, reduktimin e shërbimeve dhe kufizimin e udhëtimeve.
“Përgjegjësia për këtë situatë bie e gjitha mbi vendet anëtare”, deklaron Guterres.
Buxheti i OKB-së për 2018-2019 shkon afër 5 miliardë euro, pa përllogaritur këtu shpenzimet për misionet paqeruajtëse, që kjo organizatë drejton kryesisht në vendet afrikane. SHBA është kontribuesi më i madh me 22 për qind, por mbetet ende e paqartë nëse Uashingtoni ka derdhur të gjithë këtë shumë apo jo.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.