Lajmi i daljes pozitivë të 14 pjesëtarëve të Xhenoas, 11 lojtarë dhe 3 pjesëtarë të stafit teknik, i ka kujtuar futbollit se beteja me Koronavirusin nuk është fituar. Është rasti i parë i infektimit masiv në një skuadër të Serisë A, por që ka trembur gjithë futbollin europian.
PSG-ja e nisi kampionatin me disa të rinj, për shkak të mungesës së Nejmar, Mbape, Ikardi dhe Di Maria, ndërsa në Brazil shumë skuadra kanë rrezikuar shtyrjen e ndeshjeve për mungesë lojtarësh negativë në testin ndaj tamponit. Situata nuk është e qetë dhe në Europë kanë nisur t’i bëjnë llogaritë me atë që konsiderohet vala e dytë e Covid-19. Po Championsi? Pas ndeshjeve të fundit paraeliminatore, të enjten do të jetë gati skema e skuadrave pjesëmarrëse në fazën në grupe dhe më 1 tetor do të hidhet shorti.
Por, në kushte të tilla, të udhëtosh nëpër Europë është e frikshme. E thotë troç Mikael Zorc, drejtori sportiv i Borusia Dortmund. Dhe nëse nuk ka ndonjë shqetësim të madh për ndeshjet e radhës të kombëtareve, për sfidat e mesjavës në Ligën e Kampionëve në muajt tetor, nëntor dhe dhjetor, frika është shumë e madhe.
“Nuk besoj se situata në zonat e rrezikshme do të ndryshojë shumë deri në momentin e grumbullimit”, - ka thënë Zorc në konferencë shtypi, duke pranuar se ekziston rreziku i një karantine të shkurtër kur lojtarët të kthehen nga kombëtaret. Atë e shqetëson më së shumti Liga e Kampionëve.
“Besoj se nuk janë absolutisht kushtet ligjore për t’i luajtur këto ndeshje. Nëse luajmë në zona të rrezikshme të mërkurën, - dhe kjo gjë ka shumë mundësi të ndodhë, duke parë numrin e qyteteve të rëndësishme me probleme sa u takon të infektuarve, - duhet ta bëjmë në një mënyrë të tillë që të jemi të qetë në Bundesligë të shtunën”, - ka theksuar Zorc. Sigurisht, kjo nuk është mënyra më e mirë për të përgatitur edicionin e ri të Ligës së Kampionëve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.