Një ditë pas shkarkimit, Meta e nis me “Mëngjes Lutjesh”

Ditën e parë pasi Kuvendi vendosi për shkarkimin e tij, duke ja përcjellë Gjykatës Kushtetuese raportin e Komisionit Hetimor, Presidenti Ilir Meta e nisi me lutje.

Presidenca njofton se Meta mori pjesë përmes një video-mesazhi në takimin e përvitshëm tradicional të “Mëngjesit të Lutjeve”, që mbahet në Jeruzalem dhe organizuar nga homologu i tij izraelit, Reuven Rivlin.

“Shqiptarët janë krenarë që kanë qëndruar pranë dhe në krah të popullit hebre gjatë periudhës së errët të Luftës së Dytë Botërore, duke sakrifikuar jetën e tyre për të mbrojtur familjet hebreje, që ishin të strehuara në vendin tonë. Asnjë hebre i vetëm nuk iu dorëzua nazistëve dhe asnjë jetë e vetme hebreje nuk u shua në Shqipëri gjatë asaj periudhe të tmerrshme”, tha ndër të tjera në mesazhin e tij Presidenti Meta.

“Sot shpreh mbështetjen tonë të vazhdueshme për ju dhe i lutem Zoti të sjellë paqe dhe paqe jo vetëm në vendin tuaj, te fqinjët tuaj dhe rajonin ku jetoni, por në çdo vend që vuan nga konfliktet!”, vijon mesazhi i Metës.

Presidenca thotë se në këtë takim mori pjesë edhe ish-Sekretari i Shtetit, Mike Pompeo.