Ngrohja globale po ngroh netët më shumë se ditët

Sipas një vlerësimi të kryer në mbarë botën, për ngrohjen globale ka treguar se netët po bëhen më të ngrohta se ditët.
Gjetjet kanë "pasoja të thella" për jetën e egër dhe aftësinë e tyre për t'u përshtatur me këtë ndryshim dramatik të klimës, gjithashtu edhe për aftësinë e njerëzve për t'u freskuar natën gjatë valëve të rrezikshme të nxehtësisë. Shkencëtarët krahasuan ngritjet e temperaturave ditën dhe natën gjatë 35 viteve deri në 2017 dhe më shumë se gjysma e tokës, kishte një ndryshim prej të paktën 0.25 gradë celsius natën.
Në dy të tretat e atyre vendeve, netët ngroheshin më shpejt se ditët, veçanërisht në Evropë, Afrikën perëndimore, Amerikën Jugore perëndimore dhe Azinë Qendrore. Por në disa vende në jug të SHBA, Meksikë dhe Lindjen e Mesme ditët ngroheshin më shpejt. Ndryshimet janë rezultat i ngrohjes globale të cilat kanë shkaktuar ndryshime në re. Atje ku mbulesa e reve rritet, rrezet e diellit bllokohen gjatë ditës, por retë mbajnë më shumë nxehtësi dhe lagështirë gjatë natës. Kjo bën që netët nxehen gjithnjë e më shumë në krahasim me ditët.
Ekosistemet kanë evoluar pasi ka ndryshuar ekuilibri mes specieve dhe shumë aktiviteteve biologjike të tilla si ushqimi që ndodhin në një kohë specifike të ditës. Kështu që ndryshimet asimetrike mes temperaturave të natës dhe ditës në shumë pjesë të botës "do të kenë pasoja të thella për speciet që banojnë në ato rajone dhe aftësinë e tyre për t'u përshtatur përballë ndryshimit të klimës", thanë shkencëtarët.

Hulumtimi është botuar në revistën Global Change Biology.
Daniel Cox, një studiues në universitetin e Exeter dhe udhëheqës i studimit, tha:
“Ne demonstruam se ngrohja më e madhe gjatë natës lidhet me klimën që bëhet më e lagësht dhe kjo tregohet duke pasur pasoja të rëndësishme për rritjen e bimëve dhe mënyrën se si bashkëveprojnë speciet,” shtoi Cox.
Jeta e egër tashmë është në telashe të thella, me popullsitë globale që kanë rënë me një mesatare prej 68% që nga viti 1970. Disa ndryshime të shkaktuara nga ngritja e temperaturës janë regjistruar më parë nga shkencëtarë të tjerë. Ekipi i Cox gjithashtu vështroi rritjen e bimësisë dhe zbuloi se ishte zvogëluar atje ku netët ngroheshin më shpejt se ditët, ndoshta sepse mbulesa e rritur e reve bllokon diellin. Sidoqoftë, rritja e bimëve u zvogëlua gjithashtu në vendet ku ditët ngroheshin më shumë, pasi kishte më pak re dhe më pak reshje. Të dy efektet ka të ngjarë të ulin rendimentet e të korrave dhe për shembull, të zvogëlojnë prodhimin e nektarit dhe polenit tek i cili mbështeten shumë insekte.
“Ndërsa është shumë herët për të përcaktuar ndikimin në ndonjë specie individuale, kjo gjetje potencialisht e rëndësishme ofron prova të mëtejshme të çekuilibrove që i detyrohen natyrës nga njerëzimi.Ne e dimë që duhet të marrim masa urgjente për të ndaluar dhe përmbysur ndikimin e njerëzimit në natyrë, duke përfshirë shkurtime të shpejta dhe të thella të emetimeve të gazrave serë,” shpjegoi Mark Wright, drejtori shkencor i studimit.
Pasqyrat e krizës klimatike shpesh përqendrohen në ngritjen mesatare të temperaturës globale, por ndikimet ndryshojnë shumë në të gjithë botën. Studimet e mëparshme të klimës kanë treguar se disa zona, të tilla si Arktiku dhe pllaja e Himalajeve, po nxehen shumë më shpejt se diku tjetër dhe se pranvera po vjen më herët dhe ngricat dhe dëbora po bëhen më pak të zakonshme.
Burimi:The Guardian/Përktheu:Gazeta “Si”

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.