Gazeta Si - Përveç dëmeve materiale, në zonat e përmbytura në Shqipëri, risku më i madh duket se do të jetë ngordhja e kafshëve dhe shpendëve.
Ndonëse nuk ka asnjë informacion në lidhje me shëndetin e kafshëve në këto zona, eksperti veterinar Gani Moka thotë se pas ngordhjes, rreziku më i madh është përhapja e mikrobeve që gjendet në brendësi të trupit të kafshës.
“Mikrobet që dalin nga trupi pas kalbëzimit të trupit të shpendit a kafshës bëhen burim infeksioni për kafshët e tjera të gjalla ndaj duhet treguar kujdes i shtuar dhe ndërhyrje e menjëhershme për të parandaluar përhapjen e infeksionit”, thotë për Gazetasi.al eksperti Moka.
Sipas tij, i takon Autoriteteve Veterinare, që të eliminohen sa të jetë e mundur risqet nga kafshët e ngordhura të cilët mund të kenë sëmundje.
“Duhet urgjentisht të mblidhen kafshët e ngordhura nga përmbytjet, të groposen sipas një procedure të AKU, AKVBM (Autoritetit Kombëtar të Veterinarisë dhe Mbrojtjes së Bimëve) me qëllim reduktimin në maksimum të këtij rreziku.
I pyetur nga Gazetasi.al, kryetari i bashkisë së Shkodrës, Bardh Spahia, thotë se nga informacionet e drejtorisë rajonale të AKVMB, janë marrë masat për grumbullimin dhe groposjen e rreth 30 krerëve bagëti e imët në fshatin Kuç.
“Nga inspektoriati rajonal veterinar si dhe nga njësitë administrative, raportohet që nuk kemi kafshë të ngordhura si pasojë e përmbytjeve”, thotë Spahia.
Ndërsa në një komunikim zyrtar të saj, institucioni i AKVMB, njofton se deri më tani nuk ka pasur nevojë për ndërhyrje në ferma blegtorale apo sipërfaqe të mbjella bujqësore.
“Kontrollet e veterinerëve dhe agronomëve tanë janë të përqendruar më së shumti në zonat e vlerësuara me risk nga përmbytjet”, shkruan AKVMB duke lënë edhe një numër kontakti në rast nevoje.
“Për të kërkuar ndihmë, mund të kontaktoni në numrin e gjelbër 08003366 ose në faqen e akvmb.gov.al”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.