Art dhe Kulture

Nexhmije Pagarusha, thirrja për ndihmë e Bilbilit të Këngës


 Bilbili i këngës shqipe, mbrëmjen e ditës ë djeshme ka lëshuar tinguj ndihme.

E gjendur në banesën e saj, këngëtarja Nexhmije Pagarusha ka kërkuar për ndihmë mjekësore si pasojë e lëndimeve. Ekipet e ndihmës së shpejtë janë parë të mbërrijnë në lagjet “Ulpiana”, ku jeton ylli 85-vjeçar i muzikës shqipe e më pas është dërguarnë Qendrën Klinike Universitare të Kosovës. Nga kjo qendër është bërë gjithashtu e ditur edhe gjendja aktuale e saj, tashmë e normalizuar. Zëdhënësi i QKUK-së,Shpend Fazliu ka  thënë se pacientes po i kryhen  ekzaminimet e duhura në klinikën e radiologjisë.

Vetëm një muaj më parë Pagarusha, e pagëzuar si mbretëresha e muzikës popullore, kishte festuar ditëlindjen e 85-të të saj. Muzikës i është larguar prej disa kohësh, megjithatë nuk i rezistoi ngasjes për t’u rikthyer edhe njëherë në një duet me këngëtaren Violetë Kukaj-Retkoceri me këngën “Mbushni gotat”.

Veprimtaria e saj  50 vjeçare në muzikë është shënjuar me këngë që kanë bërë epokë dhe janë kthyer në të paharrueshme si “Baresha”, “Zambaku i Prizrenit”,  “Ani mori nuse” e shumë të tjera.  
Në Kosovë, Nexhmije Pagarusha është shpallur s ‘Këngëtarja e Shekullit”, në vitin 2012 presidenti i Shqipërisë, Bujar Nishani i dha  titullin “Nderi i Kombit”.  Po ashtu me medalje mirënjohjeje është dekoruar edhe nga presidenti amerikan Donald Trump.

E lindur më 7 maj të vitit 1933 në fshatin Pagarushë të Malishevës,  ajo do të ndiqte shkollën e muzikës për solo kanto në Beograd, duke marrë vendimin t’i ndërpriste studimet në vitin e tretë.  Në skenat e Beogradit shënoi edhe  paraqitjen e parë muzikore në skenë. Në vitin 1948 nisi punën si  soliste në Radio Prishtinë. Ka qenë  pjesëmarrëse në koncerte të organizuara  në Kosovë, Shqipëri, Bullgari e  Izrael. Sarajeva do të qe edhe stacioni i fundit i karrierës së saj, pas një koncerti të organizuar atje në vitin 1984.  Pas 16 vjetësh larg skenës, ajo u paraqit në vitin 2000 me këngën “Për ty” në një emision të drejtuar nga Ardit Gjebrea e po ashtu ishte anëtare e jurisë së festivalit “Kënga Magjike 2005”.

E dashur nga publiku i gjerë për vokalin e saj dhe këngët që tashmë bëjnë pjesë në repertorin historik të muzikës shqiptare , karriera e Pagarushës  i ka kaluar kufijtë e muzikës popullore,  duke interpretuar në filma, teatër e po ashtu në muzikën klasike me veprat e përkthyera shqip të Bethovenit, Puçinit e Verdit. Mendohet se gjatë karrierës, Pagarusha  ka interpretuar mbi 150 këngë.
 


Copyright © Gazeta “Si”



Më Shumë