.png)
Nga Gazeta ‘Si’- Shifra e 10 milionë turistëve që vizituan Shqipërinë në 2023-shin sapo është zyrtarizuar edhe nga të dhënat më të fundit të INSTAT.
E përkthyer në përqindje, për të gjithë vitin e shkuar erdhën 34.6% turistë më shumë se në vitin 2022.
Të dhënat për dhjetorin tregojnë se Shqipëria u vizitua nga 616.994 turistë të huaj dhe nga 745.517 shtetas shqiptarë, përkatësisht me një rritje prej 57.6% dhe 29.9%.
Rajoni me hyrjen më të lartë të turistëve të huaj është Europa me 571.348 shtetas pasuar nga Amerika dhe Azia Lindore /Paqësori, përkatësisht me 9.845 dhe 2.617 shtetas.
Rritje të ndjeshme kanë ndjerë udhëtimet për pushime dhe vizita tek të afërm, përkatësisht me 65.1% kundrejt një viti më parë. Kjo tipikisht edhe për shkak të festave të fundvitit ku emigrantët kthehen në vend pranë familjeve dhe të afërmeve.
Udhëtimet për biznes dhe qëllime profesionale u rritën me 20.4%.
Daljet e shtetasve
Teksa numri i të huajve që kanë hyrë në vend në fund të vitit ka qenë në rritje duket se shtetasit shqiptarë kanë udhëtuar më pak jashtë vendit.
Daljet e shtetasve shqiptarë nga territori i Shqipërisë, gjatë dhjetorit janë 602.346. Krahasuar me dhjetorin e shkuar ky tregues ka rënë me 5.1%. Ndërsa daljet e shtetasve të huaj janë 550.083. Ky tregues është rritur me 26.3%.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
