.png)
Gazeta Si – Trajneri katalanas është në majën e listës së drejtuesve të futbollit anglez, të cilët ëndërrojnë të shkojnë në Botërorin e radhës me Guardiolën në stol.
Pep Guardiola është favorit për t’u ulur në stolin e Anglisë në 2024-ën, kur skadon kontrata e Gereth Southgejt, që pritet të lërë ‘Tre Luanët’ pas Europianit. Biesdimet me trajnerin katalanas, që mund të duken të thjeshta për arsye të ndryshme, nuk kanë nisur ende zyrtarisht.
Prej 7 vitesh në stolin e Mançester Sitit, Guardiola ka kontratë deri më 30 qershor 2025, por, sipas ‘Daily Mail’, nuk përjashtohet dëshira e tij për të nisur një aventurë të re.
Gjithmonë duke iu referuar shtypit britanik, Federata angleze e futbollit duket shumë optimiste se mund ta bindë spanjollin. Kontrata e tij me Sitin mund të jetë një pengesë për FA-në, por do të bëhen të gjitha përpjekjet për të shkuar në Botërorin e 2026-ës, që zhvillohet në SHBA, Mekisë dhe Kanada, me Guardiolën në drejtimin e kombëtares.
Trajneri i Mançester Sitit nuk e ka fshehur dëshirën për të drejtuar një kombëtare një ditë, por Spanja mund të përjashtohet si mundësi për shkak të mbështetjes së hapur të Guardiolës për pavarësinë e Katalonjës. Më parë emri i Guardiolës ka dalë edhe në listën e kandidatëve për të drejtuar Brazilin, që tashmë ka zgjedhur Karlo Ançelotin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
