.png)
Në një kohë që klima politike është shumë e nxehtë pas anulimit të zgjedhjeve të 30 qershorit nga ana e presidentit Ilir Meta, ish-deputetja e Partisë Demokratike, Jorida Tabaku hedh akuza të forta për qeverinë.
Ajo e cilëson antikushtetues vendimin e ripërcaktimit të kufijve të bashkive firmosur nga zv/kryeministri Erjon Braçe në fund të majit 2019.
“Nuk ka ndryshim harte që i shpëton nga humbja! VKM e qeverisë për ndryshimin e hartës është një veprim anti-kushtetues dhe në kundërshti me parimet demokratike të zgjedhjeve. Reforma Territoriale e votuar në 2015 ka pasur tërësisht synime elektorale dhe ka dështuar në çdo qëllim të paracaktuar nga qeveria. Qytetarët paguajnë tarifa dhe taksa më të larta dhe nuk marrin asnjë shërbim në këmbim. PD do ta ribëjë reformën territoriale duke pasur si qëllim eficencën në qeverisjen vendore dhe jo pushtetin politik sikundër mazhoranca socialiste ka pasur dhe ka si synim thelbësor.
Çdo vendim që marrin, çdo ligj që shkruajnë ka qëllim mbajtjen e pushtetit në kundërshti me frymën demokratike dhe kushtetutën e vendit. Më i fundit në radhë është ri përcaktimi i kufijve të bashkive nga ana e qeverisë me VKM nr. 360 të firmosur nga zv/kryeministri Braçe në fund të majit 2019”, shprehet ish-deputetja Tabaku.
Sipas saj, VKM për ndryshimin e hartës është antikushtetuese, pasi në të vërtetë është një reformë elektorale.
“Pikërisht kjo VKM është një provë e fortë që vulos bindshëm dhe përfundimisht akuzën tonë se Reforma Territoriale është në të vërtetë një Reformë Elektorale alla Gerrymandering. Në fjalë më të qarta, reforma territoriale qe një kurth përmes së cilës mazhoranca socialiste ka përdorur për të projektuar ndarjet e bashkive që vetëm ajo të mundet të fitojë zgjedhjet”, vijon më tej Tabaku.
Tabaku thekson faktin se sipas saj, qeveria pretendoi se Reforma Territoriale do të prodhonte bashki më eficente, por në fakt është e kundërta pasi shqiptarët jetojnë më keq.
“Për t’i hedhur hi syve, qeveria pretendoi se Reforma Territoriale do të prodhonte bashki më eficente, shpenzime të reduktuara, të ardhura më të larta dhe shërbime më të mira të ofruara shqiptarëve. Rezultati është tërësisht i kundërt me premtimet e qeverisë; borxhi i bashkive është rritur me 82% në fund të vitit 2018 ndërkohë që mbi 50% e bashkive kanë përkeqësuar treguesit e borxhit. Një nivel të lartë ka dhe borxhi i prapambetur, ku nivelin maksimal të detyrimeve të prapambetura e ka bashkia Tiranë me rreth 2.0 miliardë lekë, ose 29.5% ndaj stokut total në fund të vitit 2018.
Sakaq taksat vetëm për qytetin e Tiranës janë rritur kumulativisht me 328.9 mln euro ndërkohë që qytetarët marrin më pak shërbime në një bashki që ka trefishuar sipërfaqen territoriale. Në kundërshti të plotë me premtimin se do të uleshin shpenzimet për paga (që do të thotë ulje e numrit të punonjësve) e vërteta rezulton e kundërta. Shoqata e Bashkive raporton se numri i të punësuarve në bashkitë e vendit është rritur me 11 mijë e 500 punonjës në raport me 2015”, shprehet ish-deputetja.
Sipas saj, qeveria po bën çdo gjë në shërbim të pushtetit, pavarësisht se në kundërshti me ligjin.
“Në këto kushte natyrshëm mund të shtrohet pyetja se përse ishte e nevojshme kjo reformë territoriale? Përgjigja është “Vota”. Tanimë nuk është e habitshme për askënd që çdo gjë që bëhet është në funksion të pushtetit, që nga lidhjet me krimin e deri te harta territoriale, përdorin çdo mekanizëm për ta mbajtur apo fituar atë. Reforma alla gerrymandering që përcaktojnë kufijtë e bashkive sipas interesit të tij është njëra prej tyre. Vendimi i datës 29 maj 2019 është një skemë tjetër që qeveria po ndjek në kundërshti me Kushtetutën e vendit.
Ligji kërkon që këto vendime jo vetëm të jenë pjesë e një diskutimi publik por gjithashtu edhe që të miratohen nga Këshillat Bashkiake”, shkruan më tej Tabaku.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
