Me akuzën e korrupsionit pasiv dhe shpërdorimit të detyrës janë vënë në pranga gjashtë punonjës të Policisë Kufitare në Gjirokastër. Ndalimi i efektivëve të Policisë është bërë nga Shërbimi për Çështjet e Brendshme dhe Ankesat pas një hetimi disa mujor.
Sipas njoftimit zyrtar të SHÇBA, policët janë vënë për shkak se dyshohen se kundrejt ryshfetit, ndihmonin në kalimin e kufirit të personave që kishin probleme në zonën Shengen. 6 punonjësit e Policisë Kufitare akuzohen se kishin kryer shkeljen e ligjit kryesisht në zonën kufitare të Kakavijës.
SHÇBA bën me dije se duke shpërdoruar detyrën, këta punonjës policie në kohë të ndryshme kishin lehtësuar kalimin e paligjshëm nëpërmjet vijës së gjelbër, kundrejt shpërblimit. 6 efektivët e Policisë së Gjirokastrës janë mbajtur nën vëzhgim nga shërbimet e SHÇBA për një kohë të gjatë, për të dokumentuar veprimtarinë e paligjshme të tyre.
Pas arrestimit të gjashtë efektivët kanë dalë para Gjykatës së Rrethit gjyqësor Gjirokastër, e cila ka vendosur për këta punonjës policie, masën e sigurisë “Arrest me burg”.
Këta janë gjashtë efektivët e Policisë Kufitare Gjirokastër që janë vënë në pranga nga shërbimet e SHÇBA:
Gentian Gjolleshi, punonjës i Policisë Kufitare Gjirokastër
Luan Shosha, punonjës i Policisë Kufitare Gjirokastër
Roland Gega, punonjës i Policisë Kufitare Gjirokastër
Afrim Çomo, punonjës i Policisë Kufitare Gjirokastër
Edmond Nikolla, punonjës i Policisë Kufitare Gjirokastër
Fatmir Beqo, punonjës i Policisë Kufitare Gjirokastër
Bashkë me 6 efektivët e Policisë Kufitare Gjirokastër në pranga është vënë edhe shtetasi Besnik Sinani, nga Fieri. Sakaq, policia bën me dije se po punohet për ndalimin e një shtetasi tjetër të shpallur në kërkim, i cili gjithashtu akuzohet se ka marrë pjesë në këtë veprimtari të paligjshme.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.