Kanë ardhur reagimet e para të selive diplomatike të vendeve huaja lidhur me protestën e Opozitës. Të parat që kanë shpërndarë apelet e tyre në rrjetet sociale lidhur me protestën kanë qenë ambasadat e SHBA-së, BE-së dhe Britanisë. Në reagimet e këtyre tre selive diplomatike në Tiranë dënohet njëzëri dhuna e përdorur në këtë protestë. Ambasada amerikane në Tiranë në postimin e saj në facebook dënon me forcë dhunën e përdorur gjatë kësaj demostrate. “Mbështesim të drejtën e qytetarëve për të protestuar paqësisht, por dëmtimi i pronës publike dhe dhuna nuk janë të pranueshme,”- shkruan ndër të tjera ambasada amerikane.
Edhe përfaqësia e Bashkimit Europian në vendin tonë ka bërë apel për vetëpërmbajtje nga të gjitha palët dhe se dëmtimi i pronës publike është i papranueshëm.
Ndërkohë ambasada e Mbretërisë së Bashkuar në një postim të shkurtër në facebook shkruan se është në krahë të respektimit të ligjit dhe të atyre që bëjnë thirrje për demonstrata paqësore.
Dhunën e përdorur në protestë e ka dënuar edhe përfaqësia e OSBE në vendin tonë. Sipas OSBE nxitësit dhe autorët e dhunës mbajnë përgjegjësi për incidentet e sotme.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.