Ndërhyrje nga qeveria dhe palë të treta, FIFA pezullon dy federata

FIFA ka vendosur të pezullojë me efekt të menjëhershëm dy federata të saj, federatën e Çadit dhe federatën e Pakistanit. Vendimi për federatën afrikane është marrë për shkak të ndërhyrjes së autoriteteve qeveritare.

Konkretisht, qeveria i ka hequr federatës së Çadit fuqinë për të marrë vendime dhe ka krijuar një komitet kombëtar për administrimin e përkohshëm të futbollit në vend.

"Pezullimi do të hiqet sapo vendimet e qeverisë së Çadit të shfuqizohen dhe drejtimin e futbollit ta marrë sërish federata e këtij vendi”, - shkruhet në njoftimin e FIFA-s.

Në rastin e Pakistanit pezullimi ka ardhur për shkak të ndërhyrjes së palëve të treta, çka përbën një shkelje të rëndë të statutit të FIFA-s. Situata është provokuar nga pushtimi i selisë së federatës së Pakistanit nga një grup manifestuesish, si dhe nga vendimi i disa individëve për të larguar komitetin e drejtuar nga Haron Malik për t’ia dhënë drejtimin e federatës Syed Ashfaq Hussain Shah.