Kryeministri Edi Rama u përsëriti naftëtarëve se kushti i tij për të lënë grevën dhe më pas për të nisur bisedimet për zgjidhjen e problematikës së tyre është i panegociueshëm.
“Unë jo vetëm nuk po hesht, por po përsëris çdo ditë: Ndalni grevën dhe ulemi diskutojmë për hallin tuaj! Nuk ka negociata me presione e me ultimatume në një familje, po ka qarje halli me logjikë e me zemër të hapur!”, shkroi Rama në rrjetet sociale.
Zgjidhja sipas Kryeministrit është “e thjeshtë:Dilni nga greva dhe do vij unë vetë tek ju menjëherë”.
Nga ana tjetër, naftëtarët këmbëngulin se protesta e tyre nuk është politikë dhe mirëpritën kërkesën e Ramës për të biseduar, por nuk mirëpresim thirrjen e tij për të lënë grevën. Ata kërkojnë që t’u derdhen në llogari të gjitha rrogat e prapambetura dhe më pas le të nisin bisedimet.
“Ta harrojë Kryeministri që të ndalim grevën ne. Nuk i besojmë, të gjitha mashtrime. Janë bërë të gjithë të pabesueshëm. Duam rrogat e prapambetura dhe rifillim e punës. E lëmë grevën po të na i hedhin të gjitha lekët në llogari. Të hedhi lekët që të hamë dhe bukë që sot”, thonë ata.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.