.png)
Gazeta Si - Aleksei Navalni vdiq të premten (16 shkurt) gjatë orarit të ajrimit në burgun Kharp, në Siberinë Veriore, ndoshta nga një goditje e shkaktuar nga një emboli arteriale.
Kjo, të paktën sipas filtrimit të lajmeve zyrtare nga kolonia penale IK-3 (e njohur nga të gjithë si "Ujku Polar"), ku në Krishtlindje kishte mbërritur blogeri që ishte bërë kundërshtari kryesor i Putinit.
Por bashkëpunëtorët e tij, familjarët dhe një pjesë e madhe e opinionit publik ndërkombëtar, kanë pak dyshime.
Disa madje mendojnë se ai u vra, ndërsa shumica besojnë se Navalni vdiq për shkak të gjithçkaje që iu bë.
Së pari helmimi me agjentin kimik “Novichok”, një substancë nervore; pastaj burgu me privime që duket e paimagjinueshme.
I dënuar me 19 vjet (por akuza të tjera i vareshin mbi kokë), ai përfundoi në burg në janar 2021.
Në total ai kishte kaluar 300 ditë në izolim për ato që familja e tij i denoncoi si mangësi qesharake apo akuza të çuditshme.
“I burgosuri nuk kishte mbyllur butonin e fundit të xhaketës”, 15 ditë në izolim. "Navalni ofendoi toger Nejmovich, duke e quajtur kështu në vend që të përdorte emrin dhe patronimin e tij", 15 ditë izolim. “I burgosuri pastroi keq oborrin”, 15 ditë të tjera.
Në këto qeli të veçanta, shtrati ngrihet dhe mbyllet në mur në mëngjes dhe të burgosurit nuk mund të shtrihen ose të ulen gjatë gjithë ditës. Ushqimi i ofruar ishte "i keq dhe i pakët", tha zëdhënësja e tij, Kira Yarmysh.
Për një vit e gjysmë ai nuk ishte lejuar të takohej apo të fliste me telefon me gruan dhe dy fëmijët e tij.
Tre avokatët, të cilët ai i takoi me njëfarë rregullsie, u akuzuan nga ana e tyre për ekstremizëm. Dy janë në burg dhe një ka ikur jashtë vendit.
Një situatë për të cilën gruaja e tij Julia, duke folur në Mynihu në Gjermani, e vuri në pikëpyetje presidentin drejtpërdrejt: "Ky regjim dhe Vladimir Putin janë personalisht përgjegjës për të gjitha gjërat e tmerrshme që i kanë bërë vendit tonë, familjes time dhe burrit tim".
Deri në fillim të dhjetorit, Navalni kishte qenë në një koloni penale në Vladimir, 200 kilometra larg Moskës.
Më pas transferimi në veriun e ashpër, ku në këtë periudhë temperaturat bien edhe deri në 40 gradë nën zero.
Para se të largohej, ai tashmë ishte ndjerë i sëmurë në qeli dhe kishte rënë në dysheme. Mjekët nxituan menjëherë për të rihapur shtratin dhe i vendosën një IV në krah.
Navalni, përmes avokatëve të tij, tha se lejohej të "ecte" i vetëm në atë që ai e quajti "një qeli tjetër".
Gjithsesi, gjithmonë në mënyrë që gjërat të mos ishin shumë komode për këtë të burgosur, ora e tij e ushtrimeve fillonte në orën 6.30 të mëngjesit, me temperatura arktike.
Sipas rrëfimit zyrtar, ish-blogeri ishte “jashtë për një shëtitje” (d.m.th., duke pasur një orë ajër të pastër), kur papritur u ndje i sëmurë.
Megjithatë, kjo do të kishte ndodhur në orën 13:00 sipas kohës lokale, në kundërshtim me rutinën e burgut, sipas kanalit Telegram Baza.
U bëënë përpjekje për reanimim, më pas nga spitali Labytnangi, 34 kilometra larg, mbërritën mjekë të tjerë ("për shtatë minuta", sipas një deklarate zyrtare nga autoritetet lokale), të cilët vazhduan masazhin kardiak për gjysmë ore.
Putini u informua menjëherë për atë që kishte ndodhur, por nuk tha asgjë. Zëdhënësi i tij la të kuptojë për të gjithë liderët perëndimorë për reagimet e tyre “të papranueshme”, duke qenë se ende nuk dihet se çfarë ka ndodhur saktësisht.
Dhe në qarqet pranë Kremlinit vihet re se kjo vdekje që vjen një muaj para zgjedhjeve presidenciale, është një dhimbje koke e madhe për Putinin, i cili po llogariste një rikonfirmim të mërzitshëm (pa kundërshtarë të vërtetë), por të qetë.
Në shumë qytete u vendosën lule. Dhe prokuroria i paralajmëroi menjëherë të gjithë se demonstratat do të ishin kundër ligjit.
Përshtati në shqip: Gazeta "Si"
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
