Alarm te Milani. Zllatan Ibrahimoviç ka pësuar një dëmtim në pulpë dhe rrezikon të qëndrojë jashtë fushave për një kohë të gjatë. Bëhet fjalë për një tërheqje, por frika e stafit mjekësor është se mund të jetë prekur edhe “tendina e Akilit”. Nëse është tërheqje, rikuperimi kërkon një deri në dy muaj kohë, ndërsa po të jetë dëmtuar edhe tendina, do të duhej shumë më shumë kohë. Burime nga klubi i Milanit bëjnë me dije se është dëmtuar vetëm pulpa.
Ibrahimoviç është dëmtuar në fundin e ndeshjes testuese në stërvitje. Gjatë një vrapimi ai ka ndjerë dhimbje të fortë dhe është detyruar të lërë Milanelon, qendrën stërvitore të kuqezinjve. Nesër do të kryejë analizat dhe vizitat e nevojshme. Shqetësimet në pulpë e ndalën sulmuesin suedez edhe në shkurt, kur humbi ndeshjen me Veronën dhe u kthye në derbi. Tani ekziston frika për një dëmtim më serioz, edhe pse duhen pritur përgjigjet e analizave.
Sido që të shkojë, dëmtimi i sulmuesit 38-vjeçar e privon Milanin nga një lojtar i rëndësishëm dhe i stërvitur, pasi Ibrahimoviç kishte punuar në Suedi me Hamarbin. Një mungesë e madhe në një moment kyç të sezonit, kur kampionati pritet të rinisë dhe ndeshjet do të jenë shumë të ngjeshura.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.