Lajme

Meta me presidentin gjerman: Mirënjohës për mbështetjen

Presidenti Ilir Meta gjatë një takimi me Presidentin e Republikës Federale të Gjermanisë, Frank-Walter Steinmeier vlerësoi marrëdhëniet e shkëlqyera midis dy vendeve dhe shprehu mirënjohjen e thellë për mbështetjen 30-vjeçare të Gjermanisë për zhvillimin e Shqipërisë.
Në mënyrë të veçantë, presidenti Meta vlerësoi vëmendjen e madhe që presidenti Steinmeier dhe Gjermania u kushtojnë marrëdhënieve me Shqipërinë dhe zhvillimeve në rajonin e Ballkanit Perëndimor.
Duke u ndalur te zhvillimet më të fundit në rajon, të dy presidentët kanë ndarë të njëjtin vlerësim se arritja e Marrëveshjes së Prespës është një shembull i suksesshëm që inkurajon edhe Kosovën edhe Serbinë për normalizimin e marrëdhënieve dhe arritjen e një marrëveshjeje të qëndrueshme në interesin më të mirë të paqes, stabilitetit dhe integrimit europian.
Nga ana e tij, presidenti Steinmeier e siguroi presidentin Meta se Gjermania do të vazhdojë të jetë një partner i rëndësishëm dhe mbështetës kryesore në proceset integruese për Shqipërinë dhe të gjitha vendet e rajonit, me synim jo vetëm ruajtjen e stabilitetit dhe paqes në Ballkan, por mbi të gjitha, për t’i ndihmuar ata në avancimin e reformave për një zhvillim ekonomik të qëndrueshëm, forcimin e shtetit ligjor dhe prosperitetin e popujve të rajonit.
Në fund të takimit, presidenti Meta e ka ftuar presidentin Steinmeier për një vizitë zyrtare në Shqipëri, që u mirëprit me kënaqësi.


Copyright © Gazeta “Si”


Më Shumë