Gazeta Si – Tifozët e Lionel Mesit, të cilët nuk mundën të shihnin në fushë idhullin e tyre në një ndeshje miqësore në Hong Kong, do të rimbursohen me 50% të çmimit të biletës me kushtin që të mos ndjekin asnjë rrugë ligjore.
Ky është vendimi që kanë marrë së fundi organizatorët e eventit. Inter Majemi luajti një ndeshje egzibicioni më 4 shkurt në Hong Kong, por Mesi qëndroi gjithë kohën në stol, sepse vinte pas një dëmtimi.
Tifozët u zhgënjyen shumë, sepse ata kishin shkuar në stadium për të parë në aksion yllin argjentinas, duke paguar deri në 4800 dollarë të Hong Kongut (570 euro).
Publiku nuk e pëlqeu aspak edhe sjelljen e Mesit, i cili nuk kërkoi ndjesë. Më pas lojtari u justifikua, duke thënë se mungesa e tij në fushë nuk kishte të bënte me “arsye politike”.
“Tatler Asia”, që organizoi eventin, ka pohuar se ata që do të kërkojnë rimbursimin e biletës, duhet të pranojnë kushtin për të mos ndjekur asnjë rrugë ligjore në lidhje me atë që ndodhi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.