.png)
Lionel Mesi dhe Luis Suarez kanë qenë protagonistë me Argjentinën dhe Uruguain në ndeshjet e fundit. Të dy kanë shënuar me penallti dhe në të dyja ndeshjet ka pasur polemika të forta për vendimet e gjykimit, sidomos te sfida Uruguai-Kili, 2-1.
VAR-i në fakt ka marrë më shumë vëmendje se dy sulmuesit e njohur, pasi ka vendosur 2 nga 3 ndeshjet e xhiros së parë të eliminatoreve të Botërorit. Ekuadori është ankuar për penalltinë në favor të Argjentinës në “Bombonera”, ku Mesi shënoi golin e 71-të me kombëtaren. Me zë më të lartë është ankuar Kili për ndeshjen e Montevideos, duke pretenduar për një penallti të mohuar dhe një tjetër të paqenë të dhënë për Uruguain (edhe në këtë rast ishte vendimtare ndërhyrja e VAR-it).
Argjentina kthehej të luante një ndeshje pas 11 muajsh dhe nuk u paraqit në nivelin që pritej. Skuadra e Skalonit nuk shfaqi entuziazëm, duke u mjaftuar me 3-4 raste goli pas penalltisë së shënuar nga Mesi. Pa Dibalën me probleme shëndetësore dhe Papu Gomezin në stol, Argjentinës i munguan idetë dhe ritmi. Në fillim pati pretendime për një penallti të mohuar ndaj Mesit dhe më pas një penallti bujare që solli irritimin e ekuadorianëve.
Në Montevideo u luajt një ndeshje e tensionuar dhe që u vendos nga Maksi Gomez në kohën shtesë. Vendimet e arbitrit u kontestuan gjithë kohën, duke nisur nga prekja me dorë e Vegas që shkaktoi penalltinë e parë të kthyer në gol nga Suarez. Para se Gomez të shënonte golin e fitores për Uruguain, nuk u akordua një penallti e shkaktuar nga Koates. Për Kilin kishte barazuar Aleksis Sançez në minutën e 54-t, pas një asisti të Aranguiz. Ivan Xmaorano, ish-sulmuesi i njohur i Kilit, shkroi në Tuiter: “Deri kur do të vazhdojnë këto vjedhje? Kush i komandon arbitrat? Hajdutë! Ndeshja iu dhuruar Uruguait”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
