.png)
Gazeta Si - Autori i dyshuar i rrëmbimit të Leonard Thodhorit dhe Fatmir Sulovarit ngjarje e ndodhur në Sarandë në muajin prill, është arrestuar në Fier.
Sipas Policisë së Shtetit, Albi Mëcini u kap me dy çanta me eksploziv, të montuara dhe gati për shpërthim.
Policia ka shpallur në kërkim dhe dy bashkëpunëtorë të tjerë të 29-vjeçarit, të cilët dyshohet se ishin bërë gati për të kryer një vrasje. Në kërkim janë shpallur Ervis Cukali, Sebastian Lataj dhe Arafat Manërkolli.
LEXO EDHE:
- Zhdukja e dy personave në Sarandë, dyshohet se janë vrarë dhe groposur në fshatin Vrinë. Makina e “autorëve” dhe pistat e hetimit
- Familjarët e dy të zhdukurve nga Saranda protestë në Tiranë te Policia e Shtetit: Të gjenden trupat
Mësohet se 29-vjeçari nga Kamza, Albi Mëcini, njihet dhe si miku i ngushtë i Admir Tafilit dhe është akuzuar nga Prokuroria e Korçës si bashkëpunëtor për arratisjen e Tafilit dhe 6 personave të tjerë nga burgu i Drenovës mbrëmjen e 23 nëntorit 2013.
Policia sekuestroi 2 automjete, 2 çanta me rreth 21.3 kg lëndë plasëse artizanale, e montuar me celularë, për shpërthim në distancë, 3 bidonë me benzinë dhe 4 celularë.
Sipas policisë, 29-vjeçari i arrestuar me çantat me lëndë plasëse, është autor i dyshuar për zhdukjen e Leonard Thodhorit dhe Fatmir Sulovarit para disa muajsh.
“Në kuadër të megaoperacionit “Misteri”, në aksin rrugor “Mbrostar-Fier”, shërbimet e Forcës se Posaçme Operacionale dhe ato të Forcës së Posaçme “Shqiponja”, të DVP Fier, kapën në flagrancë shtetasin A. M., 29 vjeç, banues në Kamzë, me 2 çanta brenda të cilave ishin 2 pako me rreth 21.3 kilogramë lëndë plasëse artizanale, të montuara me celularë, për shpërthim në distancë. Te dyja çantat u gjetën në afërsi të automjetit të këtij shtetasi. Gjithashtu, nga kontrolli i zonës ku u kap shtetasi A. M., u gjet një tjetër automjet në brendësi të të cilit ishin 3 bidona me lëndë djegëse benzinë. Nga veprimet hetimore rezulton se 29-vjeçari, në bashkëpunim me shtetasit A. M., 27 vjeç, banues në Dibër dhe E. C., 25 vjeç, banues në Tiranë (të cilët u shpallën në kërkim), i kishin siguruar këto kushte dhe mjete, me qëllim kryerjen e një ngjarjeje të rëndë kriminale”, njofton policia.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
