Nga Gazeta ‘SI’ - Shqipëria ka normën më të ulët të shpenzimeve për mbrojtje sociale në rajon dhe e dyta në Europë, pas Turqisë. Sipas matjeve të Eurostat, Shqipëria i ka dedikuar këtij zëri 12.8% të PBB-së së vendit në 2021-shin. Analiza vazhdon me ndarjen sipas funksioneve, pra cilat grupe sociale marrin më shumë ndihmë.
Ashtu si në vendet e tjera, edhe në Shqipëri, pjesa më e madhe shkon për të moshuarit që marrin pensionin, 53.6 % e totalit të fondit. Më pas janë shpenzimet për kujdesin shëndetësor 24.2%. sipas tabelës, vlera më e vogël shkon për strehimin dhe eliminimin e përjashtimit social, vetëm 0.7% e shpenzimeve.
Përcaktimi i fondeve për mbrojtjen sociale është e njëjtë në të gjithë Europën, por shpërndarja e tyre sipas grupeve në nevojë është më e drejtë dhe me më pak diferenca. Në total, për vitin 2021, shpenzimet e këtij zëri në Europë kapën vlerën e 4.2 trilion euro, sa 28.7% e PBB-së.
Përveç masës, Eurostat raporton edhe mënyrën e ofrimit të kësaj ndihme. Shqipëria mban vendin e parë si shteti që preferon t’a japë ndihmën sociale në cash. 70% e këtyre shpenzimeve janë dhënë në para të thata, tregojnë statistikat e BE-së. Pjesa tjetër kanë marrë “përfitime në natyrë”, pra jo vlera monetare të drejtpërdrejta, por ndihmë në procese të ndryshme.
Kjo mënyrë nuk është e pazakontë për vendet e tjera, por dominon në Mesdhe, me Italinë, Greqinë dhe Shqipërinë në krye.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.