Një "bimë" ende e panjohur për autoritetet vendore në Vlorë ka mbirë në hyrje të qytetit, duke detyruar kryetarin e Bashkisë, Dritan Leli që t’u kërkojë qytetarëve që të mos i afrohen deri në përcaktimin se përse bëhet fjalë.
Bima e pahasur ndonjëherë, sipas Dritan Lelit, ka "mbirë" gjatë këtyre 40 ditëve, që banorët e Vlorës dhe të gjithë Shqipërisë janë vendosur në karantinë.
“Na rezulton se gjatë këtyre 40 ditëve të karantinës, në hyrje të Vlorës ka mbirë një lloj i panjohur bari i lartë që e ruan vesën gjatë gjithë kohës në formë të konservuar përgjatë trupit. Bashkia e Vlorës do të angazhojë Institutin e Bimëve për të analizuar shkaqet e lindjes dhe përbërjën biologjike të kësaj specieje”, thotë Leli.
“Ju bëjmë thirrje të gjithë qytetarëve të mos i afrohen pa u zbuluar më parë efekti i kësaj bime mbi organizmin e njeriut! Për momentin bimë të tjera dhe pemë të ndryshme po shtohen rrotull barit të çuditshëm me përmasa gjigante që ka dalë në hyrje të qytetit”, mbyll deklaratën e tij kreu i Bashkisë së Vlorës.
Në të vërtetë, bëhet fjalë për një instalacion artistik të vendosur nga bashkia e qytetit të Vlorës, si një simbol i pranveror, por edhe si “provokim artistik” për të thënë që kur njeriu mbyllet në shtëpi, natyra shpërthen.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.