Hamendësimet e vakta që kanë qarkulluar në disa media për një marrëveshje mes Edi Ramës dhe Lulzim Bashës u ngritën si shqetësime konkrete nga ana e deputetëve të rinj të opozitës, përkatësisht nga Ralf Gjoni i dalë nga listat e LSI-së dhe Rudina Hajdari që refuzoi vendimin e PD-së për djegien e mandatit.
“Marreveshjet e fshehta politike po na kthehen në element statistikor. Marrëveshje në 2008, Marrëveshje në maj 2017! Prapë kërkohet marrëveshje edhe sot! E çfarë na kanë sjellë ne këto marrëveshje, përveç përmbushjes së oreksit të pangopur të 2-3 peshqëve të mëdhenj, të cilët vazhdojnë të qëndrojnë mbi kolltuqe si bajraktarë të pandëshkuar e të pacenuar nga forca e ligjit?”, deklaroi Ralf Gjoni.
Rudina Hajdari u shpreh e sigurtë se një marrëveshje e fshehtë është bërë, por jo për shqipëtarët.
"Shumë njerëz më thonë, mos se Shqipëria nuk bëhet mos se je vetëm, mos se këta kanë bërë marrëveshje. Unë e ndjej se këto kanë bërë marrëveshje, por jo për shqiptarët, por për zuzarët”, deklaroi ajo.
Që të dy deputetët kërkuan nga përfaqësuesit e mazhorancës një përgjigje nëse mes tyre dhe Bashës ka një marrëveshje të tillë. Përgjigjen ua dha Taulant Balla.
"Nuk do i japim mundësi Bashës dhe bandës së tij që të marrin peng vendin dhe të përdhosin Kushtetutën. Ne nuk bëjmë kurrë marrëveshje në kurriz të Kushtetutës dhe zgjedhjet do të bëhen në 30 qershor", deklaroi Balla.
Kreu i grupit parlamentar paralajmëroi rrëzimin e dekretit të Presidentit Ilir Meta, me anë të të cilit ky i fundit riktheu për shqyrtim ligjin për vettingun në polici.
“Shumica do të rrëzojë dekretin e zotit Meta dhe ftesa ime për opozitarët e rinj ësht që të bashkoheni për ta mbështetur”, shtoi ai.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.