Nuk luajti javën e parë ndaj ish-skuadrës së tij, Veronës, por ndaj Juventusit Marash Kumbulla zbriti në fushë nga minuta e parë në atë barazim 2-2. Trajneri Fonseka i besoi një fanellë titullari mbrojtësit të Kombëtares shqiptare, që iu bashkua Romës disa ditë më parë. Një ndeshje pozitive për Kumbullën, i cili është vlerësuar me notën 6.5 nga shtypi sportiv italian. Ai dhe Ibanjez ishin më të mirët në prapavijë.
Mbrojtësi shkodran u ndëshkua me karton të verdhë në pjesën e parë. Një mbrëmje që do të mbetet në memorien e lojtarit kuqezi, që ka hequr tashmë emocionet e debutimit dhe forma e tij pritet të vijë në rritje. Roma kaloi dy herë në avantazh me francezin Veretu në pjesën e parë, së pari me penallti e më pas me një gjuajtje të saktë në zonë. Iu përgjigj me të njëjtën monedhë Ronaldo, duke barazuar herën e parë me penallti dhe më pas me një fluturim siç di të bëjë vetëm ai.
Juventusi luajti me 10 vetë për më shumë se 20 minuta, pasi Rabiot u ndëshkua me karton të kuq dhe në atë moment rezultati ishte 2-1. Kapiteni Edin Xheko kishte dy mundësi shumë të mira për ta mbyllur ndeshjen, por gaboi dhe më pas erdhi ndëshkimi nga Ronaldo. Pas dy javësh kampionat, Juventusi ka 4 pikë, kurse Roma 1 pikë.
Milani ka fituar 0-2 në fushën e Krotones, me gola te Kesi me penallti dhe Brahim Diaz. Kuqezinjtë udhëheqin renditjen me 6 pikë, po aq sa ka edhe Napoli i Elseid Hysajt dhe Verona. Kapiteni i Kombëtares ishte titullar në fitoren tenistike, 6-0, të Napolit ndaj Xhenoas. Hysaj luajti në të majtë të mbrojtjes dhe dha një asist në këtë ndeshje.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.