Aventura e Mario Manxhukiç në Katar ka zgjatur vetëm 6 muaj. Sulmuesi korat ka prishur kontratën me ekipin Al Duhail dhe është zyrtarisht në merkato. Nga Italia vijnë zërat e parë për një rikthim surprizë të sulmuesit në Serinë A.
Është një okazion, që sipas “Tuttosport”, kërkon ta shfrytëzojë Verona. Drejtuesit e saj po tentojnë ta bindin sulmuesin veteran të veshë fanellën e Veronës, ku një ndikim të madh mund të ketë trajneri Ivan Juriç, bashkombës i Manxhukiçit. Verona mund ta përballojë pagën e kroatit, pasi ka mbushur arkën nga shitja e Rrahmanit te Napoli dhe Amrabat te Fiorentina, pa marrë në konsideratë edhe shitjen e pritshme të Marash Kumbullës tek Interi apo te Lacio.
Futbollisti 34-vjeçar ka luajtur më parë për disa nga klubet më në zë të Europës, si Bajern Munih në Gjermani, Atletiko Madrid në Spanjë dhe Juventusi në Itali. Pas Botërorit të Rusisë, ku Kroacia shkoi deri në finale, Mario Manxhukiç i dha lamtumirën kombëtares. Ai u largua nga Juventusi për të luajtur në Katar, por tashmë “luftëtari” mund të rikthehet në Itali.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.