Festë për Mançester Sitin. Klubi anglez ka dalë fitimtar në Gjykatën e Arbitrazhit Sportiv (KAS) në Lozanë. Skuadrës së trajnerit Pep Guardiola i është hequr dënimi 2-vjeçar i UEFA-s për të mos marrë pjesë në Kupat e Europës për dy sezone.
KAS-i, pas ankimimit të bërë nga Mançester Sitit, ka shqyrtuar çështjen dhe e ka hedhur poshtë skualifikimin e vendosur nga UEFA në muajin shkurt. Në atë kohë “qeveria” e futbollit europian dha dënimin për përjashtimin nga Kupat e Europës për dy sezonet e ardhshme me argumentin se klubi anglez kishte shkelur rregullat e “Fair-Play”-it financiar.
Mbetet në fuqi gjoba prej 10 milionë euro për Sitin, por kjo është e papërfillshme për këtë skuadër që tashmë fiton qetësinë e duhur për t’i shkuar deri në fund sezonit aktual të Ligës së Kampionëve. Klubi i financiar nga sheikët mund të vazhdojë me projektet që ka pasur për të ardhmen e klubit. Këtë sezon Siti humbi titullin dhe tashmë të gjitha “bateritë” do të shkarkohen në Ligën e Kampionëve. Ekipi i Guardiolës e ka fituar 1-2 ndeshjen e parë të fazës së 1/8-ve ndaj Real Madridit dhe kalimi në çerekfinale duket shumë pranë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.